දිය නා

Mesua thwaitesii යන උද්භිද විද්‍යාත්මක නාමයෙන් හැඳින්වේ. GUTTIFERAE ගුමිෆෙරා නම් උද්භිද කුලයට අයත් ය. මීටර් 15ක් පමණ උස විශාල ශාක වේ. පැහැදිලි ශාකනයක් ඇත. තද දුඹුරු පැහැති සුමට සිවිය සහිත කඳ ඝන ව වැඩුණු පත්‍රවලින් පිරී ඇත. තීව්‍ර (acute) හෝ අතිතීව්‍ර (acuminate) අග්‍ර සහිත පත්‍ර ආයත චතරශ්‍රාකාර වේ. පත්‍ර පාදය ද තීව්‍ර ය. පුෂ්ප නිර්වෘන්තීය වේ. පත්‍ර ශාඛා අග්‍රස්ථයේ හට ගන්නා කෙටි පුෂ්ප මංජරි වෘන්තවල පුෂ්ප 1-3 බැගින් හට ගනියි. පුෂ්ප විෂ්කම්භයෙන් 7.5 cm-11.5 cm පමණ වේ. මණි පත්‍ර මඳ වශයෙන් බූව සහිත වේ. සෑම පුෂ්පයක් ම නිපත්‍ර දෙකකින් හෝ තුනකින් සමන්විත ය. මෙම නිපත්‍රවල පිහිටීම ආලග්න (තදව පිහිටි එහෙත් අබද්ධ) (adpressed) වේ. ඵලය බීජ දෙකකින් යුක්ත ය, අප්‍රපතන මණිපත්‍ර හා නිපත්‍රවලින් දැඩිව වැසී ඇත. ශ්‍රී ලංකාවට ආවේණික ශාකයකි. නිරිත දිග තෙත් කලාපයේ දිග අගල් හා වගුරු ආශ්‍රිත ව වැඩේ.

(කර්තෘ: පී.ජී.ඩී. ප්‍රදීපා සේරසිංහ‍)

(සංස්කරණය නොකළ)