ධර්මසිරි ජයකොඩි
(????-2002). කීර්තිමත් පුවත්පත් කලාවේදියෙකි. ග්‍රන්ථ කර්තෘවරයෙකි. ලංකාවේ වාමාංශික ව්‍යාපාරයේ පුරෝගාමියෙකි.
'ලක් රිවි කිරණ' සතිපතා සිංහල පුවත්පතෙහි කළමණාකාර කර්තෘ වූ කැලණියේ පෙතියාගොඩ මෑවැල්ලේ ජයකොඩි ආරච්චිගේ හෙන්ද්‍රික් මහතා ධර්මසිරි ජයකොඩිගේ සීයා ය. බණ්ඩියවත්තේ දොස්තර මහතා නමින් ප්‍රසිද්ධ වූ ඉංග්‍රීසි වෛද්‍යවරයකු වූ ජයකොඩි ආරච්චිගේ සයිමන් ධර්මසිරි ජයකොඩිගේ පියා ය. පෙතියාගොඩ ශ්‍රී සම්බෝධි පාඨශාලාව ඇතුළු පාඨශාලා කිහිපයක් පිහිට වූ සයිමන් ජයකොඩි වෛද්‍යාචාර්යතුමා ජාතික ආගමික සාමාජික ව්‍යාපාරයන්හි පුරෝගාමියෙකි. පිරිමි දරුවන් තිදෙනෙකු සහ ගැහැණු දරුවන් තිදෙනකු සහිත පවුලකට අයත් වූ ධර්මසිරි, සිය පියාගේ අකල් වියොවින් සිය අධ්‍යාපන ගමන් මඟ වෙනතකට යොමු කැර වාමාංශික දේශපාලනයට පිවිසියේ ය.
සීමාසහිත එක්සත් ප්‍රවෘත්ති පත්‍ර සමාගම ලංකාදීප පුවත්පත් සමාගම ඇතුළු මාධ්‍ය ආයතන කිහිපයක සේවය කළ ධර්මසිරි ජයකොඩි 'අර්ජුන' යන අපර නාමයෙන් ද ප්‍රසිද්ධ ය.
1952 දී ආරම්භ කළ ඉරිදා ලංකාදීප පුවත්පත ඉක්මණින් ජනප්‍රිය වූයේ ධර්මසිරිගේ සහජ පුවත්පත් කලා කුසලතා හේතුවෙනි.
සමාජ උදානය, සිංහල පෙරැළිය, ආණ්ඩු පරිණාමය, පොද වැස්ස, සත්‍යය සොයා, හිම පියලි, චෞ එන් ලායි, සිරිමාවෝ බණ්ඩාරනායක යනාදී ග්‍රන්ථ මුද්‍රණයෙන් ප්‍රකාශයට පත් කළ ධර්මසිරි ජයකොඩි සිංහල-ඉංග්‍රීසි පුවත්පත් සඟරාවනට සැපයූ ලිපි සංඛ්‍යාව අතිමහත් ය.
ස්වකීය දේශපාලන ජීවිතය ද සමකාලීන ලංකාවේ දේශපාලන, සමාජ-ආර්ථික, ආගමික හා පුවත්පත් කලාව විවිධ දෘෂ්ඨි කෝණයන්ගෙන් විචාරයට හසු කරමින් ලියූ සැඬනල හා ගිනිසිළ ධර්මසිරි ජයකොඩිගේ අවසන් නිර්මාණයයි.
කැලණියේ ගෝනවල උපන් ධර්මසිරි ජයකොඩි 2002 අප්‍රේල් මාසයේ අභාවප්‍රාප්ත විය.
(කර්තෘ: සරත්චන්ද්‍ර ජයකොඩි)
(සංස්කරණය නොකළ)
