ඩග්ලස් මැක්ආතර්
(Douglas MacArthur). (1880.01.26-1964.04.05). ඇමරිකාවේ සේනාධිපතියෙකි. දෙවන ලෝක සංග්‍රාමයේ දී ඔහු පෙන් වූ දස්කම් නිසා උසස් කීර්තියක් අත් කර ගත්තේ ය. ඔහුගේ පියා ද ඇමෙරිකාවේ ප්‍රකට යුද සෙබළෙක් විය. යුද්ධයෙන් පසු දේශපාලනයට බව හෙතෙම ජපානය ප්‍රතිසංවිධානය කිරීමෙන් සිය දස්කම් විදහා පෙන්වී ය.
යුද සෙබළුන් ආශ්‍රයෙහි හැදුණු වැඩුණු මැක් ආතර්ගේ සිත කුඩා කල සිට ම යුද සේවය කෙරෙහි ඇදී ගියේ ය. ඔහු එක්සත් ජනපද යුද්ධ ශිල්පායතනය යුද්ධාභ්‍යාස විද්‍යාලයෙන් ලබා උපාධි ලැබී ය. අධ්‍යාපනය ලබා අවසන් වූ වහා පිලිපීන දූපත්වලට යවනු ලැබූ හෙතෙම එම දූපත් පිළිබඳ සිතියම් සකස් කිරීමෙහි යෙදුණේ ය. නැවත ඇමෙරිකාවට පැමිණ උසස් තනතුරු කීපයක ම කටයුතු කොට ඇමෙරිකාව ප්‍රථම ලෝක සංග්‍රාමයට ඇතුළත් වූ සමයෙහි කර්නල් ධුරයක් ලැබී ය. පසුව ක්‍රමයෙන් බ්‍රිගේඩියර් ජෙනරාල් ධුරයට ද මේජර් ජෙනරාල් ධුරයට ද පිලිපීන දූපත්වල අණදෙන නිලධාරී තනතුරට ද පිලිපීන ආණ්ඩුවේ යුද්ධෝපදේශක ධුරයට ද හා පිලිපීන හමුදාවේ ෆීල්ඩ් මාර්ෂල් ධුරයට ද පත් කරනු ලැබී ය. 1937 දී ඔහු එක්සත් ජනපදයේ යුද හමුදාවෙන් විශ්‍රාම ගත් නමුත් පිලිපීන දූපත් ජපන් ප්‍රහාරයට ලක්වීමට ඉඩ තිබුණු හෙයින් එහි ආරක්ෂක කටයුතුවල ව්‍යාවෘත විය. එහෙත් 1941 දී මැද පෙරදිග තත්වය සතුටුදායක නොවූ හෙයින් ෆ්‍රෑන්ක්ලින් ඩී. රූස්වෙල්ට් ජනාධිපතිවරයා විසින් හෙතෙම නැවතත් යුද සේවයට කැඳවා ඈත පෙරදිග සියලු ම යුද්ධ හමුදාවල අණදෙන නිලධාරී ධුරයට පත්කරනු ලැබී ය. 1941 දී පිලිපීන දූපත්වලට ජපන් ප්‍රහාර එල්ලවීම ආරම්භ විය. පිලිපීන දූපත්වල ඇමෙරිකානු සේනා බලය ඉතා කුඩා වූ බැවින් මැක්ආතර්ට ජපන් හමුදාවලට නිර්භය ලෙස මුහුණ දීමට නොහැකි විය. ජපනුන් විසින් මැනිලා නුවර අල්ලාගත් නමුත් මැනිලා වරායෙන් ඔවුන්ට ප්‍රයෝජන ගත නොහැකි විය. 1945 දී ජපනුන් යටත් වීමෙන් පසු ජනාධිපතිවර ට්‍රෑමන් විසින් ඔහු ජපානයේ මිත්‍ර පාක්ෂික සේනාවල උසස් අණදෙන නිලධාරී ධුරයටත් ජපානයේ පිහිටුවන ලද යුද්ධ ආණ්ඩුවේ ප්‍රධාන පාලකයා ලෙසත් පත්කරනු ලැබී ය. 1950 දී උතුරු කොරියානු කොමියුනිස්ට්වරුන් දකුණු කොරියාව ආක්‍රමණය කළෙන් එක්සත් ජාතීන්ගේ සංවිධානයේ ආරක්ෂක බල ඇණියේ ප්‍රධානියා ලෙස කොමියුනිස්ට්වරුන්ට විරුද්ධ ව සටන් කළේ ය. එහෙත් පසුව ජනාධිපතිවර ට්‍රෑමන් හා ඔහු අතර පැන නැඟි මතභේදයක් හේතුකොට ගෙන යුද සේවයෙන් ඔහුට අස්වීමට සිදුවිය.
(කර්තෘ: අඥාතයි)
(සංස්කරණය නොකළ)
