අළුලෙන
මෙය කෑගලු දිස්ත්‍රික්කයේ කිනිගොඩ කෝරළයේ කරඬුපොනේ නමැති ග්‍රාමයෙහි පිහිටි පැරණි ලෙන් විහාරයකි. ස්වාභාවික පිහිටීම අනුව යෝගාවචර භික්ෂූන්ට ඉතා යෝග්‍ය සේනාසනයක් ලෙස සැලකිය හැකි මේ ලෙන් විහාරයට පහළින් කුඩා දියපාරක් ගලා බසී. ලෙන පිහිටි ගල අළුපාටින් යුක්ත වූ බැවින් අළුලෙන යන නම ඇතිවන්ට ඇතැයි එච්.සී.පී. බැල් මහතා කියයි. අඩි 5 අඟල් 6ක් දික් වූ ශ්‍රීපාද ලාඤ්ඡනයක් සහිත සෙල්මුවා මල්පෝරුවක් මෙහි ඇත. සිරිපා සටහනෙහි නෙළුම්මල් හා ධර්මචක්‍රය ද කැටයම් කර තිබේ. මීට නුදුරුව තවත් ලෙන් කීපයෙකි. උඩ කොටසේ පිහිටි ලෙනක මුදුනේ ශිලාලිපියක් වෙයි. ඉතා පැරණි යුගයට අයත් අක්ෂරවලින් යුත් යථෝක්ත ශිලාලිපියෙහි "පරුමක ඉජ්හු පුත පරුමක අගිය ලෙණෙ සගස" (පරුමක ඉජ්හුගේ පුත්‍ර වූ පරුමක අගියගේ ලෙන සඟනටය) යන පාඨය ඇතුළත්ය. මෑත භාගයෙහි ගොඩ නඟන ලද කුඩා විහාරයක් ද මෙහි ඇත. කොළඹ-නුවර පාරේ 51 වන සැතපුම් කණුවට සැතපුම් 1½ක් දුරින් යථෝක්ත ලෙන් පිහිටි උස් භුමිය වේ.
(සංස්කරණය: 1965)
