ආපස්තම්බ
ක්‍රිස්තු පූර්ව 600ටත් 300ටත් අතර කාලයක ඉන්දියාවේ ජීවත් වූවකු හැටියට සැලකෙන ග්‍රන්ථ කර්තෘවරයෙකි. ඔහු විසින් නිෂ්පාදිත කල්පසූත්‍රය කෘෂ්ණ යජුර්වේදයේ තෛත් තිරීය ශාඛාවට අයත් ග්‍රන්ථයකි. ආපස්තම්බීය කල්ප සූත්‍රයෙහි ශ්‍රෞත සූත්‍රය, ගෘහ්‍ය සූත්‍රය, ධර්ම සූත්‍රය යයි කොටස් තුනක් ඇත. ශ්‍රෞත සූත්‍රයෙහි මහායඥ ගැන ද ගෘහ්‍ය සූත්‍රයෙහි සංස්කාරාදිය පිළිබඳව ද ධර්ම සූත්‍රයෙහි ලෞකික ධර්ම, සිරිත් විරිත් හා දණ්ඩනාදිය පිළිබඳව ද විස්තර දැක්වේ. මේ හැර ආපස්තම්බීය ස්මෘති නමින් යුත් ග්‍රන්ථයක් ගැන ද සඳහන් වේ. ආපස්තම්බ යනු පෙළපත් නාමය බැවින් මෙකී හැම ග්‍රන්ථයක් ම එක ම කර්තෘවරයකුගේ කෘති හැටියට නොව එකී සම්ප්‍රදායයේ (ශාඛාවේ) ආදිකර්තෘවරයාගේත් ඔහුගෙන් පැවත එන්නන් කීප දෙනකුන්ගේත් නිෂ්පාදන හැටියට සලකනු ලැබේ.
පාණිනී ව්‍යාකරණයේ සතරවන අධ්‍යායයේ විදාදිගණය විස්තර කිරීමේ දී අනිකුත් නම් සමග ආපස්තම්බ යන නාමය ද සඳහන් කර තිබෙන බැවින් ඔහු ජීවත්ව සිටි කාලය අනුමාන වශයෙන් නිගමනය කර ගත හැකිය.
(සංස්කරණය: 1965)
