ආයාකූවෝ
පීරු රටෙහි මධ්‍ය ප්‍රදේශයෙහි පළාතක් හා නගරයක් මෙනමින් හැඳින්වේ. මුහුදු මට්ටමේ සිට අඩි 10,000ක් පමණ උස් වූ භූමි ප්‍රදේශයක පිහිටි ආයාකූවෝ පළාත ඉතා කඳු සහිතය. කඳු වැටි අතර නිම්න සාරවත්ය. ඝර්මකලාපීය ප්‍රදේශයක් වුව ද උස් වූ පිහිටීම නිසා මෙහි දේශගුණය සෞම්‍යය, සිසිල් ය. වර්ග සැතපුම් 17,569ක් පමණ විශාල වූ මෙහි ජනගහනය (1953) 519,225ක් පමණ වේ. පශු පාලනය ද, රන්, රිදී හා තඹ ආකර කර්මාන්තය ද, වැඩි වශයෙන් කොකෝවා, ඇල්ෆැල්ෆා හා ධාන්‍ය වර්ග වැවීම ද පළාත්වාසීන්ගේ ප්‍රධාන ජීවනෝපාය මාර්ගයෝය.
මෙහි අගනුවර වන ආයාකූචෝ නගරය 1539 දී ෆ්‍රැන්සිස්කෝ පිසාරෝ විසින් ඉදිකරන ලදි. කලින් ගුවමංගා නමින් හැඳින්වුණු මේ නගරය ආයාකූචෝ වශයෙන් නම් ලද්දේ 1925 දී ය. ආගමික කටයුතු අතින් මෙන් ම වෙළෙඳ කටයුතු සම්බන්ධයෙන් ද ආයාකූචෝ නගරය ප්‍රසිද්ධියක් උසුලයි. මෙහි ජනගහනය 23,800කි (1953).
(සංස්කරණය: 1965)
