ආණ්ඩුවේ අධිනීතිඥයා
(Crown Counsel). ඇටෝර්නි ජනරාල්ගේ සහාය පිණිස අධිකරණ සේවා කොමිසම විසින් පත් කරනු ලබන අධිකරණ නිලධාරීහු මෙනමින් හඳුන්වනු ලබත්. මෙම පදවියට පත්වන තැනැත්තන් අවශ්‍යයෙන්ම අධිනීතිඥයන්ව සිටිය යුතුය. ආණ්ඩුවේ අධි නීතිඥයා ආණ්ඩුවේ පෙරකදෝරු කෙනෙකුගේ තත්ත්වයෙන් වෙනස් වූවෙකි. වර්ෂ 1883ට පෙර ආණ්ඩුවේ අධිනීතිඥයා හඳුන්වන ලද්දේ "මහරැජින ගේ අධිනීතිඥයාගේ නියෝජ්‍යයා" කියායි.
ඇටෝර්නි ජනරාල් සෑම අපරාධ නඩුවකටත් සෑම සිවිල් නඩුවකටත් ආණ්ඩුව වෙනුවෙන් පෙනී සිටිය යුතු වේ. රජයේ සියලු අධිකරණ කටයුතු ඔහු භාරයේ පවතී. එහෙත් ඔහු සතු වූ කාර්‍යයන් හුදකලාව ඉටු කිරීම ඔහුට උගහටය. එබැවින් රජයේ අධිකරණ කටයුතු කාර්යක්ෂම ලෙස ඉටු කිරීමට පුහුණුව ලත් නීතිඥයන් කිහිප දෙනෙක් ඔහුට අවශ්‍ය වෙති. ආණ්ඩුවේ නීතිඥයන් වන්නේ මොවුන්ය. විශාල වශයෙන් අපරාධ නඩු නිතර ඉදිරිපත් කරන දෙපාර්තමේන්තු දෙකකි. එනම් පොලිස්, සුරාබදු යන දෙපාර්තමේන්තුයි. මෙම දෙපාර්තමේන්තු මගින් ඉදිරිපත් කරන යම් යම් පැමිණිලිවලට අයත් සාක්ෂි පරීක්ෂාකොට ඒවායේ නීත්‍යනුකූල තත්වය මිනිය යුත්තේ ඇටෝර්නි ජනරාල් තැනය. එහි ලා ඔහුට බෙහෙවින් සහාය වන්නේ ආණ්ඩුවේ නීතිඥවරුන්ය. මෙකී දෙපාර්තමේන්තුවලට අවශ්‍ය නීති උපදේශ දීම ද ඔවුන් සතු කාර්යයකි. ආණ්ඩුවට විරුද්ධව පැවරෙන සිවිල් නඩුවල දී ද ඇටෝර්නි ජනරාල්ගෙන් ඉටුවිය යුතු කාර්යය ඉටු කරනු ලබන්නේ ආණ්ඩුවේ නීතිඥයන් විසිනි. අතිශයින් ම වැදගත් වූ නඩුවක දී හැර අන් සැම නඩුවක දී ම ආණ්ඩුව වෙනුවෙන් පෙනී සිටින්නේ ආණ්ඩුවේ නීතිඥයායි. (ඇටෝර්නි ජනරාල් ද බ.)
(සංස්කරණය: 1965)
