මායා රංජන්
පාලි සංස්කෘතා දී ප්‍රාචීන භාෂාවන්හි මෙන්ම ඉංගිරිසියෙන් ද හසල දැනුමකින් හෙබි මායාරංජන් අතින් කැරුනු ත්‍රෝජපුර සංග්‍රාමය නමැති කෘතිය පරිවර්තන කාර්යයෙහිලා ඔහු සතු සුවිශේෂ දක්ෂතා මනාව ප්‍රකට කරයි. වන සංග්‍රාමය නීලා, වීදිය බණ්ඩාර, මගේ රාජ්‍යය, පිටිසර මිනිස්සු, හීනෙන් ගෑ සුවඳ, කුමාරයා සහ රන්මැණිකා, අපේ රාජ්‍යය, දිගාමඩුල්ලේ ආශ්චර්‍ය්‍යය, කලිසම හා සුකුමාරි මහෞෂධය, සහෝදරයෝ දෙන්නා, පණ්ඩුකාභය, ප්‍රේම පූජාව, අටල්ලේ උන් කුමාරිය නිර්භීත පුංචි සන්නාලියා යන නිර්මාණ ඔහු අතින් බිහිවිය. කෙටි කතාවට නවකතාවට මෙන්ම වෘත්තාන්ත රචනයෙහි ද බුහුටි බවක් දැක්වූ මේ ලේඛකයා ග්‍රන්ථකරණයෙහි දී උපයෝගී කැරගත්තේ ඔහුට ම ආවේණික වූ සුවිශේෂ ශෛලියකි. එසේම ඈත පිටිසර ගම්වල අභාවයට යෙමින් පැවති පාරම්පරික සංස්කෘතිකාංග හා සාම්ප්‍රදායික චාරිත්‍ර වාරිත්‍ර සිත් ගන්නා සුළු අයුරින් ස්වකීය නිබන්ධ තුලින් ඉදිරිපත් කිරීමට මායා රංජන් සමත් වූයේ. නමින් මා රාජපක්ෂ වුව ද මායා රංජන් යන ආරූඪ නමින් රසාලිප්ත නිබන්ධ රාශියක් සපයා සිංහල සාහිත්‍යය පෝෂණය කළ මේ ලේඛකයා 1968.11.19 දී අභාවප්‍රාප්ත විය. ඇලෙක්සැන්ඩර් නමැති පරිවර්තනය ඔහුගේ අවසාන කෘතියයි.
(කර්තෘ: සරත්චන්ද්‍ර ජයකොඩි)
(සංස්කරණය නොකළ)
