ඇල්ෆ්‍රඩ් මිල්නර්
(Viscount Milner). වෛකෞන්ට්වරයෙකි. බ්‍රිතාන්‍ය දේශපාලනඥයෙකි, ජනපද පාලකයෙකි. දකුණු අප්‍රිකාවේ බ්‍රිතාන්‍ය මහ කොමසාරිස්වරයා ලෙස ද කෝප් කොලනිස් ආණ්ඩුකාරවරයා ලෙස ද කටයුතු කෙළේ ය.
ජර්මනියේ බොන් නුවර දී මෙළොව එළිය දුටු මිල්නර් ඔක්ස්පර්ඩ් විද්‍යාලයේ අධ්‍යාපනය ලැබී ය. ඔහු හර්ට්ෆෝර්ඩ්, ක්‍රේවන් ආදී ශිෂ්‍යත්ව කීපයක් ම දිනාගත්තේ ය. පුවත්පත් කලාවේදියකු ලෙස ජීවිකා වෘත්තිය ආරම්භ කොට පසුව සිවිල් සේවයට බැඳී එංගලන්තයේ ද ඊජිප්තුවේ ද උසස් තනතුරු දැරී ය. ඊජිප්තුවේ සිට ආපසු පැමිණි නොබෝ දිනකින් ම ඔහු විසින් “එන්ග්ලන්ඩ් ඉන් ඊජිප්ට්” නමැති ග්‍රන්ථය ප්‍රකාශයට පමුණුවන ලදි. 1899 දී පැනනැගුණු බ්‍රවර් යුද්ධයට ප්‍රථමයෙන් එනම් 1997 දී හෙතෙම දකුණු අප්‍රිකාවේ මහ කොමසාරිස්වරයා ලෙස ද කේජ් කොලනියේ ආණ්ඩුකාරවරයා ලෙස ද පත් කරනු ලැබී ය. බූවර් අරගල සම්බන්ධයෙන් සමථයකට පැමිණෙනු වස් දකුණු අප්‍රිකානු සමූහාණ්ඩුවේ ජනාධිපතිවර පෝල් ක්‍රැගර් සමඟ සාකච්ඡා පැවැත්වූ හෙතෙම, එම සමූහාණ්ඩුවෙහි ඕලන්ද ජාතිකයනට සහ ඉංග්‍රීසි ජාතිකයනට සමාන අයිතිවාසිකම් නොලැබුණු එකම ගිවිසුමකටවත් එකඟ නොවී ය. බූවර් යුද්ධයෙන් පසු ට්‍රාන්සිවානියාවත් ඔරෙන්ජ් රිවර් ජනපදයත් පාලනය කරන ලද්දේ මිල්නර් විසිනි. 1905 දී ආපසු එංගලන්තයට ගිය ඔහු අධිරාජ්‍ය කටයුතු සම්බන්ධයෙන් ඉතා උද්‍යෝගීමත් ලෙස ක්‍රියා කෙළේ ය. හර්බර්ට් ඇස්කින්ගේ සහ ලොයිඩ් ජෝර්ජ්ගේ ඒකාබද්ධ ආණ්ඩුවල (joint government) සේවය කළ මිල්නර් ප්‍රථම ලෝක සංග්‍රාමයෙන් පසු අවසන් වරට යටත් විජිත ලේකම් ධූරයට පත් විය. 1920 දී ඊජිප්තුවට ගිය දූත මණ්ඩලයේ ප්‍රධානියා ලෙස හෙතෙම පත් කරනු ලැබී ය. එසේම ඊජිප්තුවට නිදහස ලබාදීමෙහිලා ඔහු විශේෂ ප්‍රයත්නයක් දැරී ය. මිල්නර් 1921 දී විශ්‍රාම ගත්තේ ය. 1925 දී පරලෝසැපත් විය.
(කර්තෘ: අඥාතයි)
(සංස්කරණය නොකළ)
