මුවසිරිස
මෙය සත්විසි නැකැත් අතුරින් පස්වැන්න ය. රෝඛාවන්ගෙන් එකිනෙක සම්බන්ධ කළ විට මුවෙකුගේ හිසක බඳු සටහනක් ඇති කරන සුදුපාට තරු තුනක් මීට අයිති ය. මේ නැකත දේවගණයි, සැපිනි යෝනියි, කළුවර වෘක්ෂයි, භේරුඬ පක්ෂීයි, පඨවි භූතයි, අක්‍රීය ගෝත්‍රයි, පංචම වර්‍ණයි, නපුංසක ලිංගයි, මධ්‍ය නාඩියි, ශිරො රජ්ජුයි, මන්දලොචනයි. වායු මණ්ඩලයට අයිතිය. සවිකා තුදුසක් ගිය තැන ඝටිකා සතරක් විෂයි. උඳු මිශ්‍ර ආහාරයක් අනුභව කර ඉඳුරු උතුරු දිශාභිමුඛව ගමන් යාමට ශුභයි. මේ නැකතින් උණ වැළදුණහොත් දින පහක් අරිටුයි. චන්ද්‍ර ප්‍රතිමාවක් තනා සුදු වස්ත්‍ර හා සුවඳ මහනෙල් මල්, දශාඛා දූප, කිරි ආහාර, ගිතෙල් ආදිය සහිතව ඉඳුරු දිග බලි තැබිය යුතුයි. මේ සඳහා නියමිත මන්ත්‍ර ජපකිරීම හා උපචාර ද කළ යුතුයි. එකල දින පහකින් උණ සුව වේ. මේ නැකත ඉරු දිනක යෙදුන කළ ශුභ යොගයි. සඳු දිනයෙහි සිද්ධි යොගයි. සැටවක සමඟ යෙදුණේ විෂ යොගයි. අටවක සමඟ යෙදුණේ නාග යොගයි. කුජ දිනයෙහි අවයොගයි. බුධ දිනයෙහි අමෘත යොගයි. ගුරු දිනයෙහි මර යොගයි. කිවි දිනයෙහි ශුභ යොගයි. ශනි දිනයෙහි අව යොගයි. මෙම නැකත ඉල් මාසයෙහි ශුන්‍ය දොසයි. උත්‍රසළ නැකතෙහි පාපග්‍රහපයක් සිටි කළ මහාශුල යොගයි. ඒ ඒ දිනාදිය සමඟ මෙම නැකත යෙදුන විට ඇති වන ශුභාශුභ යොග හැම පොතක ම වාගේ එකිනෙකට වෙනස් ව පෙනේ. පොත් වැඩි ගණනක සඳහන් වන ක්‍රමය මෙහි යෙදූ බව සැලකිය යුතුයි. මේ නැකතින් උත්පාද දර්‍ශනය වී නම් වැසි වසී. වාපිත් දෙකින් හටගත් රෝගවලින් ප්‍රජාව පෙළයි. ඉන්ද්‍රචාප (දේදුනු) දුටු කල්හි වැසි බොහෝ වේ. මේ නැකතින් මල්වර වූ කන්‍යාව ධන ධාන්‍ය හා පුත්‍ර ලාභ ඇත්තියක් වන්නී ය. හස්ති ශිල්ප, අංග ශිල්ප, මල්ලවපොර, සූප, ගීත, ශාස්ත්‍ර, විදන සමය, මංගල ක්‍රියා, ව්‍රත හෝම, ශාන්ති, ස්නාන, ජප අභිෂේක, ශාන්ත කර්‍ම, දාන, ප්‍රචාරන, පුදපූජා, කෘෂිකර්‍ම, ගෘහ ප්‍රවේශ, කරකර්‍ම, නාමකරණ, අන්නප්‍රාශන, තෛලාභ්‍යංග ආදිය මේ නැකතින් කළ යුතුයි. මින් උපන් තැනැත්තේ පවට බිය වූ විවේකයෙන් ගොර උත්සාහය හා මවට භක්තිය ඇති කටයුතුවල දක්ෂයෙක් වේ. මෙහි ප්‍රථම පාදය රවිට හිමි ය. එහි උපන්නේ විශාල කර්‍මාන්තාදියට ප්‍රිය කරන සතුරන් යන ධනවතෙක් වේ. දෙවන පාදය බුධට හිමි ය. එහි උපන්නේ සැප දුක් දෙක්හි මැදහත් වූ යාග ක්‍රියාදියට කැමති වූ සත්‍යවාදී ධනවතෙක් වේ. තුනවන පාදය කිවිට හිමි ය. එහි උපන්නේ යහපත් වචන ඇති කෙළෙහිගුණ දත් නැණවතෙක් වේ. සිව් වන පාදය කුජය හිමි ය. එහි උපන්නේ අත්මාර්‍ථකාමී වූ අනුන්ට ක්‍රෝධ කාරක, වණ කැළලින් යුත් ශරීර ඇති කාමුකයෙක් වේ. මේ නැකතින් උපන් ජන්මයාට කුජගේ නක්ෂත්‍ර මහා දශාව පළමුවෙන් ඇති වේ. අහසේ වූ ගජ විථියෙන් කොටසක් මේ නැකතට අසුවේ. වෙ, වො, කා, කි යන අකුරු සතර මේ නැකතේ පාද හතරට අයිති ය. ඒ ඒ පාදවලින් උපනුන්ට නම් තැනීමේ දී පාද අනුව මින් අකුරක් මුලට යොදනු ලැබේ. කාව්‍ය ශාස්ත්‍රයෙහි බගණය මුවසිරිස නැකතට හිමි වේ. චන්ද්‍ර දේවතාධිපති වූ මෙම නැකත වායු මණ්ඩලයට අයිති ය.
(කර්තෘ: ඩී.ආර්. සෙනෙවිරත්න: 1956)
(සංස්කරණය නොකළ)
