අල්මාදේන්
ස්පාඤ්ඤයේ සියෙරා මොරෙනා කඳුකරයෙහි උතුරු භාගයේ පිහිටි සියුදාද් රෙයාල් පළාතේ නගරයකි. රෝමන් සමයේ දී පවා රසදිය නිධි ගැන මේ ස්ථානය ප්‍රසිද්ධියක් ඉසිලීය. සාමාන්‍යයෙන් අඩි 1,200ක් පමණ ගැඹුරැති අල්මා දේන් ආකරවලින් වර්ෂයකට පිරිසිදු රසදිය ටොන් 1,000ක් පමණ ලබා ගනිත්. මෙයින් වැඩි කොටසක් යවනු ලබන්නේ ඇමෙරිකා එක්සත් ජනපදයටය. 17 වැනි ශතවර්ෂයේ දී ජර්මන් ව්‍යාපාරිකයන් කණ්ඩායමක් ද 19 වැනි ශතවර්ෂයේ දී ඉංග්‍රීසි ව්‍යාපාරික කණ්ඩායමක් ද රසදිය හාරාගත් මේ ආකර දැනට අයිති ස්පාඤ්ඤ රජයටය. කැලිපෝර්නියාවේ නව අල්මාදේන් රසදිය ආකර සොයා ගන්නා තුරු ලෝකයේ ප්‍රධාන රසදිය ආකර වශයෙන් ගැනුණු මේවා 1936–39 අතර ස්පාඤ්ඤ සිවිල් යුද්ධ සමයේ දී රජය මගින් ආරක්ෂා කරන ලදි. නගරය අවට පළාතෙන් ඊයම් ද ගෙන්දගම් ද හාරා ගනු ලැබේ. පුරාණයේ දී සිසපොන් යනුවෙන් හැඳින්වුණු ටි නගරයෙහි ජනගහනය (1940) 13,000කි.
(සංස්කරණය: 1965)
