අල්ස්ටර්
අයර්ලන්තයේ පැරැණි පළාත් හතරෙන් එකකි. කෝරළ නවයකින් යුක්ත වූ මේ ප්‍රදේශයට අයර්ලන්තයේ උතුරු භාගය සම්පූර්ණයෙන් ම වාගේ ඇතුළත්ය.
1175 දී පමණ මේ ප්‍රදේශය ඉංග්‍රීසීන් විසින් ආක්‍රමණය කරන ලදි. 1603 දී පමණ එය සම්පූර්ණයෙන් ම ඉංග්‍රීසීන්ට අයත් විය. එතැන් සිට ඉංග්‍රීසි ජාතිකයෝ ද ස්කොට් ජාතිකයෝ ද අයර්ලන්තයට සංක්‍රමණය වීමට පටන් ගත්හ. අයර්ලන්තවාසීන් ප්‍රොතැස්තන්ත ආගමට හරවා ගැනීමේ පරමාර්ථයෙන් ස්කොට් රජය ඊට තදින් ම අනුබල දුන්නේය. උතුරු අයර්ලන්තයේ ජනගහනයෙන් වැඩි කොටස ස්කොට් ජාතිකයන් වෙත් ම ඒ ප්‍රදේශය කර්මාන්ත අතින් දියුණු වන්නට විය. මෙසේ ස්කොට් ජනගහනය ප්‍රබල වීමත් ප්‍රොතැස්තන්ත ආගමේ බලපෑමත් හේතු කොටගෙන අයිරිෂ් නිදහස් රාජ්‍යය හා එක් නොවූ අල්ස්ටර් ප්‍රදේශයේ ඇන්ට්‍රිම්, ආමා, ඩවුන්, ෆර්මැනා, ලන්ඩන්ඩෙරි, ටිරෝන් යන කෝරළ හය උතුරු අයර්ලන්තය නමින් වෙන ම රාජ්‍යයක් බවට පත් විය. කැවන්, මොනගන් සහ ඩොනිගොල් නම් වූ ඉතිරි කෝරළ තුන අයර්ලන්ත සමූහාණ්ඩුවට අයත් විය. වර්තමාන උතුරු අයර්ලන්තය අල්ස්ටර් පළාතේ කොටසක් පමණි. (අයර්ලන්තය බ.)
(සංස්කරණය: 1965)
