අවතාර-1
රාත්‍රි සමයෙහි දී අන්ධකාරයෙන් ගහන වූ තන්හි නානා වේශයන්ගෙන් දක්නට ලැබෙතැයි කියන භූත විශේෂයෝ අවතාර යන නාමයෙන් හැඳින්වෙත්. අවතාර වූ කලි ජීවතුන් අතර හැසිරෙන මළවුන්ගේ ආත්ම යයි ඇතැමුන් විශ්වාස කරන අතර සමහරු ඒවා අන්ධකාරයෙහි පවත්නා යම් වස්තූන්ගේ යථා ස්වරූපය වරදවා ගැනීමෙන් මනඃකල්පිත කොට ගත්දා යයි කියති. අවතාර දැකීම ඉන්ද්‍රිය වංචනයෙන් - විශේෂයෙන්ම චක්ෂුරින්ද්‍රියාගේ වංචනයෙන් - සිදුවන්නකැයි නොයෙක් දෙනාගේ හැඟීමයි.
අවතාර පිළිබඳ විශ්වාසය ලෝකයේ බොහෝ රටවල පැතිර පවතී. කොචින්වීනය, මැලනීසියාව, ගිනියාව, අප්‍රිකාව, ඕස්ට්‍රේලියාව වැනි රටවල ජනයාට අවතාරවලින් හට ගනිතැයි කියන උවදුරු දුරලීමට නොයෙක් උපක්‍රම හා පිළිවෙත් ඒ රටවාසීන් අතර ඇති බව කියත්. අවතාර දැක බියපත් වූවන්ට නූල් බැඳීම ආදි ශාන්ති කර්මයන් කිරීමෙන් ඒ උවදුරු දුරු කට හැකිය යන විශ්වාසය ලංකාවෙහි ද පවතී. යකුන්ගේ විස්තර තොරතුරු සඳහන් වන මන්ත්‍ර, යාදිනි ආදියෙහි ගල්ගුහා, කඳු මුදුන්, ඇළදොළ, ගංගා, වැව්, රදාතොට, ළිංතොට, පාළු ගෙවල්, ග්‍රාම සීමා, සොහොන්බිම්, මළගෙවල්, සතර මංසන්ධි ආදි ස්ථාන සාමාන්‍යයෙන් අවතාර ගැවසෙන තැන් සේ කියැවේ. රීරියකා, මහසොහොනා, හූනියම් යකා ආදි යක්ෂයන්ගේ නොයෙක් අවතාර ඇතැයි ද කියත්. ඇතැම් අවතාර මගින් ගල්වැලි ආදිය දමා ගැසීම වැනි හොල්මන් කරතැයි ද විශ්වාසයක් පවතී.
(සංස්කරණය: 1965)
