අසීසි

මධ්‍යම ඉතාලියට අයත් අම්බ්‍රියා ප්‍රදේශයේ පිහිටි ඓතිහාසික කුඩා නගරයකි. මෙය ඇපිනයින් කඳුවැටියේ සූබාස්යෝ නම් කන්දේ බෑවුමෙහි අඩි 1,300ක් උස් වූ රමණීය පරිසරයෙක පිහිටා ඇත්තේය.

මධ්‍යතන යුගයේ ක්‍රිස්තියානි සාන්තුවරයන් අතුරෙහි ඉතා උසස් තැනක් ගන්නා අසීසියේ ෆ්රැන්සිස් සාන්තුවරයා (1182 දී) උත්පත්තිය ලැබූයේ ද (1226 දී) පරලෝ සැපත් වූයේ ද මෙහි දීය. එහි වූ සාන්ත ෆ්රැන්සිස්ගේ දේවස්ථානය ඉතාලියේ ආදිම ගොතික් දෙව්මැදුරයි. ෆ්රැන්සිස් සාන්තුවරයාගේ සොහොන්කොත මෙන් ම එතුමාගේ ජීවිතය පිළිබඳ විවිධ සිද්ධි පිළිබිඹු කෙරෙන බිතුසිතුවම් ද එහි දක්නට තිබේ. අනික් ප්‍රසිද්ධ දේවස්ථාන අතර ඔහුගේ නිකායයේ මූලස්ථානය වූ බැසිලිකා දෙව් මැදුර විශේෂ ස්ථානයක් උසුලයි. රෝම යුගයට අයත් නටබුන් ද 14 වැනි සියවසට අයත් මාළිගා නටබුන් ද අසීසියෙහි දක්නට ඇත්තේය.

දියුණු යයි කිව හැකි කර්මාන්තාදියක් මේ නගරයෙහි නොමැතියි. වැසියන්ගේ ආදායම වැඩි වශයෙන් ලැබෙනුයේ දේශාටකයන්ට සහ වන්දනාකරුවන්ට ඉඳුම්හිටුම් සැපැයීම ආදියෙනි. ජනගහනය (1951) 5,095කි. මෙහි ස්වර්ණමය යුගය වූයේ දහහතර වැනි සියවසයි. මධ්‍යතන යුගයේ දී මෙහි පැවති ආගමික පරිසරය තවමත් රැකී පවතී. රෝම යුගයෙහි අසීසියුම් යනුවෙන් හැඳින්වුණු මේ නගරය ප්‍රොපර්ෂස් නම් ලතින් කිවියාගේ උප්පත්තිස්ථානය ද විය.

(සංස්කරණය: 1965)