ආදිත්‍යසේන
(7 වන සියවස). මගධ රාජ්‍යයේ කෘෂ්ණගුප්ත රජුගෙන් පටන් ගැනුණු දෙවන ගුප්ත පරම්පරාවට අයත් යයි සැලකෙන රජෙකි. මාධව ගුප්ත මොහුගේ පියාය. බිසව කෝණාදේවී නම් වූවාය.
ආදිත්‍යසේන නේපාලයේ මෞඛරි වංශික භෝගවර්මන් කුමාරයාට තමාගේ දියණිය විවාහ කරදීමෙන්, නේපාලය හා මගධය අතර දේශපාලන සම්බන්ධකම් තර කර ගත්තේය. මේ දෙවන ගුප්ත පරම්පරාවේ රජවරුන් අතුරෙන් 'මහාරාජාධිරාජ' යන විරුදාවලිය භාවිත කළාවූ පළමුවන රජ මොහුය. මේ පරම්පරාවේ බලවත් ම පාලකයා වූයේ ද මොහු ම යයි කිව හැක. ආදිත්‍යසේන චෝළ රාජ්‍යය පවා ආක්‍රමණය කළ බව ද අශ්වමේධ යාග කිහිපයක් ද ඇතුළුව මහායාග රාශියක් පැවැත්වූ බව ද දියෝඝර් සෙල්ලිපියෙන් පෙනේ. එහෙත් මේ සෙල්ලිපිය පසු කලකට අයත් එකක් බැව් එහි අක්ෂරයන්ගෙන් පෙනෙන හෙයින් පූර්වෝක්ත කියමනෙහි සත්‍යයක් ඇද්දැයි යනු සැක සහිතය. නැගෙනහිර බිහාර් ප්‍රදේශයේ කොටසක් හා දක්ෂිණාපථයෙන් කොටසක් ද මොහුට යටත්ව තිබිණැයි සැලකේ.
පොත්පත්
Majumdar, R.C. — Classical Age
(සංස්කරණය: 1965)
