ජෙත්‍රො ටල්
(Jethro Tull). (1674-1741). බ්‍රිතාන්‍ය කෘෂිවිද්‍යාඥයෙකි; කෘෂිකාර්මිකයෙකි; ලේඛකයෙකි; නවෝත්පාදකයෙකි. බ්‍රිතාන්‍යයේ නූතන කෘෂිකර්මයේ හැඩගැස්ම කෙරෙහි මොහු‍ගේ අදහස් බලපෑවේය. මුලින් නීතිඥයකු වීම සඳහා පුහුණුව ලැබූ හෙතෙම පසුව තම පියාගේ පොවිපොළේ කටයුතු කෙළේ ය. 1701 දී පේළියට බීජ සිටුවීමේ යන්ත්‍රය ටල් විසින් නිපදවන ලද්දේ මෙහි දී ය. අශ්වයකු ඇදගෙන යන ලෙස සැකසුණු යන්ත්‍රයෙන් බීජ පිරිමැසුනා පමණක් නොව වල් පැළෑටි ඉවත්කිරීම ද පහසු විය. එකල පැවති, අතින් බීජ වැපිරීමේ ක්‍රමයට සාපේක්ෂ ව මෙය දියුණු ක්‍රමයක් විය. ටල් 1709 දී බර්ක්ෂයර්හි පොවිපළක් මිල දී ගත්තේ ය.
ප්‍රංසයේ හා ඉතාලියේ සංචාරය කිරීමෙන් උගත් පාඩම්වලින් ටල්, යන්ත්‍රානුසාරයෙන් පස බුරුල් කිරීමේ ක්‍රමයක් සොයා ගත්තේ ය. මේ ක්‍රමය නිසා පසට අවශ්‍ය පොහොර ප්‍රමාණය ද අඩු විය. මෙහි සාර්ථකත්වය නිසා හෙතෙම ‘The New Horse Houghing Husbandry’ නම් කෘතිය ප්‍රකාශයට පත් කිරීමට ද පෙලඹිණ.
ජෙත්‍රො ටල්ගේ නව ක්‍රමවලට ආරම්භයේ දී දැඩි ප්‍රහාර එල්ල විය. එහෙත් පසුව විශාල ඉඩම් හිමියන් විසින් මේ ක්‍රමය යොදා ගනු ලැබී ය. අවසානයේ දී මෙයින් බ්‍රිතාන්‍යයේ නූතන කෘෂිකර්මයට පදනම වැටිණ. බර්ක්ෂයර්හි දී ටල් අභාවප්‍රාප්ත විය.
(කර්තෘ: තිස්ස ඊරියගම)
(සංස්කරණය: 2019)
