අසොෆ් මුහුද

දකුණු රුසියාවේ පිහිටි වර්ග සැතැපුම් 14,500ක් පමණ විශාල වූ අභ්‍යන්තර මුහුදකි. ඉතා පටු වූ ක'ච් හෙවත් ඒනිකාලෙ නම් සමුද්‍ර සන්ධියෙන් එය කළු මුහුද හා සම්බන්ධ වී ඇත. අසොෆ් මුහුදෙහි ගැඹුර අඩි 50කට වැඩි නොවේ. ඊශාන දිගින් ටගන්රෝග් බොක්කය. බටහිරින් පටු වැලි වැටියෙකින් වෙන් වී පවතින ලුණු වගුරු ප්‍රදේශය ය. ඊශාන දිගින් ඩොන් ගඟ ද නැගෙනහිරින් කුබාන් ගඟ ද මේ මුහුදට ගලාබසී. නොවැම්බර අවසානයේ සිට අප්‍රියෙල් මැද හරිය දක්වා මෙහි දිය මිදී පවතී. මසුන් ඇල්ලීම මෙහි කෙරෙන සැලැකිය යුතු කර්මාන්තයක් නිසා තුර්කීහු මෙබලුක්-ඩෙනිශ් (මාළු මුහුද) යන නමින් මෙය හඳුන්වති. රොස්ටොෆ්, ටගන්රොග්, ස්ඩනොෆ්, ඔසිපෙන්කෝ සහ ක'ච් මෙහි ප්‍රධාන නැව් තොටවල්ය.

(සංස්කරණය: 1965)