ආවේශය
පේනකීම සඳහා දෙවිදේවතා, යක්ෂ ප්‍රේත ආදි කිසිවකු සිය කැමැත්තෙන් ආරූඪ කර ගැනීම ද උපද්‍රව කිරීමේ අදහසින් යක්ෂාදීන් මනුෂ්‍යයන්ට ආරූඪ වීම ද භූත විද්‍යාවෙහි ආවේශය යන නාමයෙන් හඳුන්වනු ලැබේ. දෙවිදේවතාවන්ට වතාවත් කරන කපුවන්ට හා ඔවුන්ගෙන් පැවත එන්නන්ට ද යකැදුරන්ට ද පහසුවෙන් ම ආවේශය ලැබිය හැකිය. එහෙත් අන්‍යයන්ට ඒ සඳහා දෙවිදේවතාවුන්ට පින්පෙත් දෙමින් බොහෝ කලක් චිත්තාරාධනයෙන් පේවී සිටීම හෝ භූතයන් බන්ධනය කර ගැනීම හෝ අවශ්‍යය. ලක්දිව ඇතැම් දේවාලවල කපුවන් පේන කියන්නේ කිසියම් දේවතාවකු ආවේශ කර ගැනීමෙනැයි කියති.
පසළොස්වක‚ අටවක‚ අමාවක‚ විසේනිය‚ තුදුස්වක‚ පෑළවිය යන තිථි ද දෙසැන්දෑව හා රාත්‍රි කාලය ද මනුෂ්‍යයන්ට භූතයන් ආවේශ වන අවස්ථා යයි සලකති. භූතාවිෂ්ටය ඇති ඇතැම් ස්ත්‍රී පුරුෂයන් මන්ත්‍ර ජප කිරීමෙන් හා හේරීවාදනයෙන් ආවේශ කරවා ඔවුන්ට ආවේශ වී සිටින යකුන්ගේ නම් ආදිය හා ආතුරයන් අත්හැර යාමට ඔවුනට දියයුතු දොළ පිදේනි ආදිය ද අසා දැනගෙන ඒවා යථා පරිදි දීමෙන් ආවේශ වී සිටින යක්ෂාදීහු පහ කරනු ලැබෙත්.
(සංස්කරණය: 1965)
