අස්ඛබාද්

අස්ඛබාද් (පල්ටරාව්ස්ක්). සෝවියට් රුසියාවේ ට‘ක්මෙන් සමූහාණ්ඩු ප්‍රදේශයට අයත් දිස්ත්‍රික්කයකි. එම ප්‍රදේශයේ අගනුවර ද අස්ඛබාද් නමි. වර්ග සැතපුම් 87,600 ක් විශාල වූ අස්ඛබාද් දිස්ත්‍රික්කයෙන් වැඩි කොටසක් කාරාකුම් කාන්තාරයට අසුවන හෙයින් ඒ පෙදෙසේ ආදායම් මාර්ග වශයෙන් ඇත්තේ ගෙන්දගම් කර්මාන්තයත් බැටළුවන් ඇතිකිරීමත් පමණි. දකුණු කොටස කෝපෙට් - ඩා (Kopet—Dagh) කඳුවැටිය ආශ්‍රිත කුඩා දියපාරවල් සහ ක්ෂේමභූමි නිසා උතුරු පෙදෙසට වඩා සාරවත්ය. තිරිඟු, මිදි සහ කපු ආදිය වගා කිරීම ද ගව, බැටළු, අශ්ව ආදි සතුන් ඇති කිරීම ද බුමුතුරුණු ආදිය විවීම ද මෙහි කෙරෙන කර්මාන්තය. ජනගහනය (1956 දී) 5,50,000කි.

අස්ඛබාද් නගරය පිහිටා ඇත්තේ කෝපෙට්-ඩා කඳුරෙකින් පෝෂණය වන අක්කල් ක්ෂේම භූමියෙහිය. 1883 දී පමණ ඉදිකරනු ලැබූ මේ නගරය වීදුරු, කපු සහ සම් කර්මාන්ත ගැන ප්‍රසිද්ධය. ට්‍රාන්ස්-කැස්පියානු දුම්රිය මාර්ගයේ වැදගත් දුම්රිය පොළක් ද වන මෙහි ට'ක්මෙන් විශ්ව විද්‍යාලය ද පිහිටා ඇත්තේය. ජනගහනය (1956 දී) 1,42,000 පමණි.

(සංස්කරණය: 1965)