ආසියාතික පදනම
1951 මාර්තු මස කැලිෆෝර්නියාවේ පුරවැසි පිරිසක් විසින් පිහිටුවනු ලැබූ මේ සංස්ථාව විශේෂයෙන් ම ආර්ථික වශයෙන් නොදියුණු ආසියාතික රටවලට සංස්කෘතික හා සමාජ ආධාර දීම සඳහා ඇති කරවන ලද පෞද්ගලික ඇමෙරිකානු ආයතනයන්ගෙන් එකකි. මුලින් නිදහස් ආසියා කොමිටිය යන නමින් හඳුන්වනු ලැබූ මෙය 1954 දී පටන් “ ආසියාතික පදනම ” යනුවෙන් හැඳින්වීමට පටන්ගෙන තිබේ. බොහෝ අග්නිදිග ආසියාතික රටවල ආසියා පදනමේ කාර්යාල පිහිටුවා තිබේ. එම කාර්යාලයක ප්‍රධානයා “නියෝජිතයා ” යනුවෙන් හැඳින්වේ. සමාජ හා සංස්කෘතික කටයුතුවලටත් ශාස්ත්‍රීය කටයුතුවලටත් පුද්ගලයන්ට හෝ ආයතනයන්ටත් ආධාර දීම පිළිබඳ කරුණු නිශ්චය කරන්නේ ඒ ඒ රටවල නේවාසික “ නියෝජිතයා ” විසිනි. ඇෆ්ඝනිස්ථානය , බුරුමය , කාම්බෝජය , ලංකාව , හොංකොං , ජපානය , කොරියාව , මලයාව හා සිංගප්පූරුව , පකිස්ථානය , පිලිප්පයින් දූපත් , තායිවාන් , තායිලන්තය හා දකුණු වියට්නාමය යන රටවල “ නියෝජිතයන් ” නවත්වා ඇත. ඉහත සඳහන් ප්‍රකාර වූ සමාජ හා සංස්කෘතික ආධාර දීම් හැරුණු විට , මෙවැනි වෙනත් ආයතන හා සහයෝගයෙන් ක්‍රියාකිරීමෙන් ආසියාතික ජනයාගේ ඉතිහාසය , සංස්කෘතිය , සිතුම් පැතුම් ආදිය ඇමෙරිකානු ජනයාට පහදා දීම ද ආසියා පදනමේ පරමාර්ථයක් යයි එම පදනමේ ව්‍යවස්ථාවන්හි සඳහන් වේ. ඉන්දියාවේ හා ඉන්දුනීසියාවේ අධ්‍යාපනික හා සංස්කෘතික කටයුතුවලට ද ඊට තරමක් අඩු ප්‍රමාණයකින් ලාඕස් , බ්‍රිතාන්‍ය බෝර්නියෝ , රයුක්‍යු දූපත් යන රටවල එම කටයුතුවලට ද ආසියා පදනමේ ආධාර ලැබේ. රටේ අවශ්‍යතාවන් හා පොහොසත්කම ආදී කරුණු අනුව පදනම මගින් දෙනු ලබන ආධාර වෙනස් වේ. පිනට මුදල් දීම, ණයට මුදල් දීම, සංචාරය සඳහා අරමුදල් දීම, කාර්මික හා විද්‍යාත්මක උවදෙස් දීම සඳහා විශේෂඥයන් සැපයීම, පොත් පත්, යන්ත්‍ර සූත්‍ර හා වෙනත් බඩු බාහිරාදිය දීම ආදි වශයෙන් විවිධ ස්වරූපයෙන් ආධාර දීම කරනු ලැබේ.සාමාන්‍යයෙන් ආධාර දෙනු ලබන්නේ අධ්‍යාපනය, පර්යේෂණ , ග්‍රාමසංවර්ධනය , ධනය, සමාජ ශුභසාධනය, සංස්කෘතික කටයුතු, අන්තර්ජාතික සම්මේලන යනාදි ශිර්ෂ යටතේය. ආසියාතික පදනම පාලනය කෙරෙන්නේ සාමාජිකයන් 24 දෙනකුගෙන් යුත් භාරකාර මණ්ඩලයක් මගිනි. ආරම්භයේ දී එහි ප්‍රධානයා හැටියට කටයුතු කෙළේ බ්‍රෙටන් විල්බර් මහතාය.පදනම අරමුදල් ලබන්නේ විවිධ පුද්ගලයන්ගෙන් හා ආයතනයන්ගෙනි.
(සංස්කරණය: 1965)
