රිචඩ් ආක්රයිට්
(1732–1792). නූල් කටින යන්ත්ර සූත්ර නිපදවීමේ පුරෝගාමියකු වූ ආක්රයිට් උපන්නේ 1732 දී එංගලන්තයේ ලැන්කෂයර් කෝරළයේ ප්රෙස්ටන් නගරයෙහිය. ඔහු දරුවන් දහතුන් දෙනකුගෙන් යුත් පවුලක බාලයා විය. බාල කාලයේ දී ඔහුට පුහුණුවක් ලැබුණේ කර නැවෑමියකු සේ රක්ෂාව කිරීමටය.
එකල පාවිච්චි කළ හා ග්රීට්ස්ගේ නූල් කටින යන්ත්රයෙන් කටින ලද නූල් හරහට වැටෙන නූල් ලෙස පාවිච්චි කරනු මිස දිග අතට වැටෙන නූල් ලෙස පාවිච්චි කිරීමට නුසුදුසු බව කාටත් වැටහිණි. මේ පාඩුව පිරිමැසීමට ආක්රයිට් විසින් "කටින රිචඩ් ආක්රයිට් රාමුව නිපදවන ලදි. එහි ප්රතිඵලයක් වශයන් රෝලවලින් නූල් කටින ක්රමය යොදාගත හැකි විය.
මේ අලුත් නිපදවීම බොහෝදුර දියුණු වූවාට පසු ආක්රයිට් නොටිංහැම් කෝරළයට ගියේය. ඔහු එහි ගියේ ලැන්කෂයර් කෝරළේ සිටි තමන්ගේ එදිරිකාරයන්ගෙන් බේරීම පිණිසය. එහි දී ඔහුගේ වැඩ කිරීමට මුදල් හිඟ වූ නමුත් ධනවතුන් දෙදෙනකු ඔහුගේ වැඩට හවුල් වීම කරණකොට ගෙන සිය කටයුතු කරගෙන යාමට උවමනා මුදල් ලැබිණ. ආරයිට් තමාගේ පළමු වැනි මෝල එහි දී පිහිටෙව්වේය. මේ මෝල ක්රියා කරවන ලද්දේ අසුන් යෙදීමෙනි. එහෙත් අසුන් යෙදවීමට බොහෝ වියදම් යන බැවින් ආක්රයිට් ජල රෝදයකින් ක්රියා කරන යන්ත්ර සහිත විශාල මෝලක් 1771 දී ඉදි කළේය.
නූල් කැටීම දියුණු කිරීමට තවත් යන්ත්ර කීපයක් නිපදවා ඒවා නිපැදවීමේ අයිතිය රැක ගැනීමට පේටන්ට් බලපත්ර කිහිපයක් ද ඔහු ලබා ගත්තේය. සිය ව්යාපාරය නිසා ඔහුට නඩුහබ කිහිපයකට මුහුණ පාන්නට සිදු විය. කැරලිකාරයන්ගෙන් ද ඔහුගේ දේපළවලට නොයෙක් විට බලවත් හානි සිදු විය. එසේ වුව ද ආක්රයිට් විශාල ධනයක් රැස් කර ගත්තේය. 1786 දී නයිට් පදවියක් ද ලැබ සිටි ඔහු 1792 දී ජන්මාන්තරගත විය.
(සංස්කරණය: 1965)
