ආභීරයෝ
මේ ගෝත්‍රිකයන් පිටරටකින් ඉන්දියාවට පැමිණියවුන් බව කීමට ප්‍රමාණවත් සාක්ෂි තිබේ. ක්‍රි. පූ. පළමුවන ශතවර්ෂයේ දී පමණ ශකවරුන් ඉන්දියාවට සංක්‍රමණය වීමට පෙර හෝ ඔවුන් සමඟ ම නැගෙනහිර අයිරානයේ සමහර පෙදෙස්වලින් මොවුන් ඉන්දියාවට එන්නට ඇතැයි සිතනු ලැබේ. ඔවුන් එසේ ඉන්දියාවට ඊමට පෙර හෙරාත් සහ කන්දහාර් යන ප්‍රදේශ දෙක අතර පිහිටි “අබිරවන්” නමින් හැඳින්වෙන ප්‍රදේශයෙහි පදිංචිව සිටින්නට ඇතැයි සැලකීමට අබිරවන් යන නමෙහි හා “ආභීර” යන්නෙහි ඇති සමානකම සාධකයක් වශයෙන් ගත හැකිය. දැනට අභිර්වාර් නොහොත් ආභීරවාට නමින් දන්නා පෙදෙසක් නැගෙනහිර මාල්වා පළාතේ ඇති නමුත් ආභීරයන් පදිංචිව සිටියේ අපරාන්ත ප්‍රදේශයේ (ඉන්දියාවේ බටහිර කොටසේ) බව සාහිත්‍ය කෘතීන්ගෙන් ලැබෙන සාක්ෂ්‍ය අනුව සිතිය හැකිය. මහාභාරතයෙහි එක් තැනක (සභා පර්වයෙහි) ආභීරයන් අපරන්තක දේශයේ වැසියන් බව සඳහන් වේ. එහෙත් තවත් තන්හි (ශල්‍ය පර්වයෙහි හා ගදායුධ පර්වයෙහි) ඔවුන් රාජපුතානා කාන්තාරය අසල සරස්වතී නදිය සිඳී යන විනශන නමැති පෙදෙසෙහි ශුද්‍රයන් සමඟ එකට වුසූ බව කියැවේ. පෙරිප්ලස් නමැති ග්‍රන්ථයෙහි (පළමුවන සියවස) හා ටොලමි පඬිවරයාගේ භූගෝලශාස්ත්‍රයෙහි (දෙවන සියවස) සඳහන් වන අයුරු අබේරියා හෙවත් අබිරියා (ආභීරවාට) පිහිටා තිබුණේ පහළ සින්ධු නිම්නය හා කතියවාර් ප්‍රදේශ අතරෙහි වූ රාජපුතානා පළාතේ නිරිතදිග කොටසේය. නේපාල රාජවංශය අභාවප්‍රාප්ත වූ පසු එම රට පාලනය කළේ ඉන්දියාවෙන් පැමිණි ආභීර ගෝත්‍රික රජවරුන් බව නේපාලයේ වංශ කථාවල සඳහන් වෙයි. දක්ෂිණපථයෙහි විසූ ආභීර ගෝත්‍රිකයන් කොටසක් ගැන මාර්කණ්ඩේය පුරාණයෙහි සහ වායු පුරාණයෙහි ද කියැවේ. මුල් කාලයේ දී ආභීරයෝ ගොවිතැන් හා එඬේරකම් කරමින් ජීවත් වූ පිරිසක් වූහ. ක්‍රිස්තු වර්ෂයෙන් දෙවන සියවසේ දී ඇතැම් ආභීරයන් බටහිර ඉන්දියාව පාලනය කළ ශක ක්ෂත්‍රපයන්ගේ සේනාධිපතීන් වශයෙන් සේවය කළ බව පෙනේ. උතුරු කතියවාර් ප්‍රදේශයේ ගුණ්ඩ නමැති ස්ථානයේ තිබී හමු වූ, ක්‍රි.ව. 181 දී කොටවන ලද, ශිලාලේඛනයක සේනාපති බාපක නමැත්තකුගේ පුත්‍රයා වූ සේනාපති රුද්‍රභූති නමැත්තකු විසින් මහාක්ෂත්‍රප රුද්‍රසිංහයන්ගේ දෙවන රාජ්‍ය වර්ෂයෙහි දී කරවන ලද තඩාගයක් ගැන සඳහන් වේ. එහෙත් මීට සුළු කලකට පසු ආභීරයන් මහාක්ෂත්‍රපයන්ගෙන් රාජ්‍ය පාලන බලය පැහැරගත් බව පෙනේ. මහාක්ෂත්‍රපයන්ගෙන් බලය පැහැරගත් ශිවදත්ත නමැත්තකුගේ පුත්‍ර “රාජමාඨරි පුත්‍ර ඊශ්වරසේන” නමැති රජකු ගැන නාසික් ශිලාලේඛනයක සඳහන් වෙයි. මේ නිසා ආභීර රාජ පරම්පරාවේ ආරම්භය ඊශ්වරසේන රජුගෙන් පසු සිදුවිණැයි කිව හැකිය. ශිවදත්තයන්ට රාජකීය විරුද නාමයන් නොමැති වීම ද මේ නිගමනයට තුඩුදෙන කරුණකි. ඊශ්වරසේන රජුගෙන් පසු රජ කළ ආභීර ගෝත්‍රිකයන් ගැන වැඩි තොරතුරක් දැනගන්නට නැතත්, සාතවාහන රජවරුන්ගෙන් පසු අවුරුදු හැටහතක් ඉන්දියාවේ ඩෙකාන් ප්‍රදේශය පාලනය කළ ආභීර රජවරුන් සද දෙනකුන් ගැන පුරාණ ග්‍රන්ථවල සඳහන් වෙයි. කෙසේ නමුත් ආභීරයන් ක්‍රිස්තු වර්ෂයෙන් සිව්වන සියවසේ මැද භාගය තෙක් ම ස්වාධීන ප්‍රාදේශීක රජවරුන් හැටියට ඩෙකානයේ බටහිර කොටස පාලනය කළ බව සමුද්‍රගුප්ත රජතුමාගේ අලහබාද් ප්‍රශස්තියෙන් පෙනේ. ඉන් පසු ආභීරයන් ගැන වැඩි තොරතුරක් නොලැබේ.
(සංස්කරණය: 1965)
[[ප්‍රවර්ගය:]]
[[ප්‍රවර්ගය:]]
