ඊස්කෙන්දරූන්
(ඇලෙක්සැන්ඩ්රොටා). දකුණු දිග තුර්කියෙහි හතේ ප්රාන්තයේ ප්රධාන නගරයයි. සිසිලියානු ටෝරස් කඳු පන්තියෙහි වැටි කීපයකින් වට වූ ඊස්කෙන්දරූන් බොක්කබඩ පිහිටියේය. වෙරළේ සිට බේලාන් දුර්ගය ඔස්සේ රට ඇතුළට යන මාර්ගය ඊස්කෙන්දරූන් නගරය හරහා විහිද ගිය හෙයින් සූවස් ඇළ ඉදි වන තුරු ම පර්සියාවෙන් හා ඉන්දියාවෙන් ගොඩබිම ඔස්සේ ගෙනෙන ලද වෙළෙඳ ද්රව්ය මධ්යධරණී මුහුද අවට පෙදෙස්වලට යවන ලද්දේ ඊස්කෙන්දරූන් වරායෙනි. දැනුදු වෙළෙඳ මධ්යස්ථානයක් හා නැව්තොටක් වශයෙන් පමණක් නොව නාවික මූලස්ථානයක් වශයෙන් ද ඊස්කෙන්දරූන් වැදගත්ය. 1960 දී නගරයෙහි ජනගහනය 62,061ක් විය.
මහා ඇලෙක්සැන්ඩර් රජු ඉසුස්හි සටනින් (ක්රි.පූ. 333) ලත් ජයග්රහණය සිහි කරනු පිණිස ඉදිකරන ලද ඇලෙක්සැන්ඩ්රියා අඩ් ඉසුම් නම් වූ නගරයෙන් ඊස්කෙන්දරූන් නගරය ආරම්භ වීල. 4 වැනි සියවසේ සිට කුඩා ඇලෙක්සැන්ඩ්රියා යන අර්ථවත් ඇලෙක්සැන්ඩ්රෙටා යන නාමයෙන් හැඳින්වී ඇත. ඊස්කෙන්දරූන් යන්න එහි තුර්කි ව්යවහාරයයි. 1919 දී සිරියාවේ ප්රංස අභිනියුක්ත භාරකාරත්වය යටතට ගත් ඊස්කෙන්දරූන් එම භාරකාරත්වය යටතේ අර්ධ නිදහස සහිත සන්ජාක් ප්රදේශයක් බවට පත්කැරිණ. II වන ජගත් සංග්රාමාවසානයේ දී සිරියාව හා ලෙබනන් නිදහස ලබාගත් කල මෙ පෙදෙස ආපසු තුර්කියට ම භාරදෙන ලදි.
(සංස්කරණය: 1970)
