ජෝන් ඊටන්

1864 දී රැස්වුණු ලංකා ව්‍යවස්ථාදායක මන්ත්‍රණ සභාවේ සිටි නිල නොලත් මන්ත්‍රීවරයෙකි. ඊටන් මේ පදවියට පත්වූයේ එකල එංගලන්තයට ගොස් සිටි මුත්තු කුමාරස්වාමි මහතා වෙනුවට වැඩ බැලීමටය. මුත්තු කුමාරස්වාමි මහතා ආපසු පැමිණියාට පසුවත් හෙතෙම මන්ත්‍රණ සභාවේ කටයුතු කළේය. යටත් විජිත ලේකම් කාර්‍ය්‍යලයත් මන්ත්‍රණ සභාවත් යුද අරමුදල් පිළිබඳව ඇති වූ මතභේදයක දී අනෙක් නිල නොලත් මන්ත්‍රීන් සමග ඊටන් ද ඉල්ලා අස් විය. ඊට පසුව නිල නොලත් මන්ත්‍රීන්ට වැඩි බලතල ඉල්ලා උද්ඝෝෂණ පැවැත්වීම සඳහා පිහිටුවන ලද ‘සිලෝන් ලීග්’ සමිතියට ද ඔහු සම්බන්ධ විය.

මුල දී මහනුවර නීතිඥ වෘත්තියෙහි යෙදී සිටි ඊටන් වැස්ලියන් සභාවට අයත් වූවෙකි. අවසාන කාලය කොළඹ ගත කළ හෙතෙම එහි දී නඩුකාර ධුරයක් ද දැරීය.

(සංස්කරණය: 1970)