ඊලි-2

මධ්‍යම ආසියාවේ ගඟකි. බටහිර චීනයේ සිංකියැං පළාතෙහි තියෙන්-ෂාන් කඳු බෑවුම්වලින් පටන්ගන්නා කුන්ගෙස් හා තේකේස් යන කඳුරැළි කුල්ජා නගරය අසල දී එක්වීමෙන් ඊලි ගඟ සැදේ. කාෂ්, චිලික් භා ෂාරින් මෙහි ප්‍රධාන අතු ගංගාය. කුල්ජාහි සිට අලාටාවු හා බොරෝකොරෝ කඳු වැටි අතරින් බටහිර දෙසට ගලන ඊලි ගඟ ඊලියිස්ක් නගරය සමීපයේ දී වයඹට හැරී ගොස් බල්කාෂ් විලට වැටේ. ඊලි ගඟ සැතැපුම් 900ක් පමණ දිගය. මේ ගංගා නිම්නයෙහි ඊලියිස්ක් නගරයට ඉහත්තාවේ කොටස ඉතා සාරවත්ය. පුරාණයේ පටන් ගොවිකම් දියුණු ගම් නියම් ගම් එහි ඇත. කුල්ජා අවට ගංගා නිම්නය සැතැපුම් 50ක් පමණ පුළුල්ය. කලෙක චීනයේ සිරකරුවන් සඳහා වෙන් වූ ඊලි නම් කුඩා පළාත මේ නිම්නයේ කොටසක් දක්වා විහිදී ගියේය. පුරාණයේ තවලම් මාර්ගයක් වශයෙන් දියුණුව පැවැති ඊලි නිම්නය දැනුදු ගමන් මාර්ගයක් වශයෙන් වැදගත් වේ.

(සංස්කරණය: 1970)