උජිජි

ටැන්සේනියාවේ ටැන්ගනීකා විලේ නැගෙනහිර ඉවුරෙහි පිහිටි නගරයකි. මීට සැතපුම් හතරක් උතුරුදිගින් පිහිටි කිගෝමාහි සිට ඩාර් එස්-සලාම් දක්වා දුම්රිය මාර්ගයක් ඇත. උජිජි අතීතයේ සිට ම වෙළෙඳ මධ්‍යස්ථානයක් වශයෙන් දියුණුව පැවැත්තේය. තවලම් මාර්ග සන්ධි ස්ථානයක් වශයෙන් ද වැදගත් වූ මෙය ඇත්දත් හා වහල් වෙළෙඳාමෙහි නිරත වූ සැන්සිබාර් අරාබීන්ගේ ප්‍රධාන මධ්‍යස්ථානයක් විය. ටැන්ගනීකා විල පළමුවෙන් දුටු යුරෝපීයයන් ලෙස ගැනෙන රිචඩ් බ’ටන් හා ජේ.එච්. ස්පීක් යන දේශගවේෂකයන් දෙදෙනා 1858 දී උජිජි නගරයට සැපත් වූහ. දකුණු දිග අප්‍රිකා දේශ ගවේෂණයෙහි යෙදුන ඩේවිඩ් ලිවිංස්ටන් උජිජි කරා පැමිණියේ 1869 දීය. ලිවිංස්ටන්ගේ ගවේෂණ කාර්යයන්ට මහත් රුකුලක් වූ එච්.ඇම්. ස්ටැන්ලිට ඔහු හමුවූයේ ද උජිජිහි දීය (1871 ඔක්තෝබර් 28). ටැන්ගනීකා විලේ යාත්‍රා කරන්නට වූ පළමු දුම්නැව 1884 දී උජිජිහි දී දියත් කරන ලදි. දැනුදු විල් තොටක් වශයෙන් උජිජි වැදගත්ය. වැඩි වශයෙන් ස්වාහීලි ගෝත්‍රිකයන් වෙසෙන මෙහි ජනගහනය (1952) 10,000ක් පමණ වේ.

(සංස්කරණය: 1970)