තොමෝමී ඉවාකුරා
(1825-1883). ජපානයේ රාජ්ය පාලකයෙකි. ක්යෝතෝහි රාජසභාවේ සංවිධායක ධුරයක් ලැබීමෙන් රාජ්ය සේවය ඇරැඹූ මෙතෙමේ මෙයිජි පුනඃස්ථාපනයට පෙර ද ඊට පසුව ද ජපානයෙහි ඇති වූ නොයෙක් දේශපාලන සිදුවීම්වල දී ප්රමුඛ ස්ථානයක් ගත්තේය. මොහු පළමුව විදේශ විරෝධී ප්රතිපත්තියක් ගෙන ගිය ද පසුව විදේශ කටයුතුවල දී මධ්යස්ථ ලෙස කටයුතු කෙළේය. එපමණක් නොව අධිරාජ සභාවත් ෂෝගුන් පාලනයත් ඒකාබද්ධ කොට සභාග රජයක් පිහිටුවීමට ඉතා උද්යෝගවත් ලෙස කටයුතු කෙළේය. ඔහුගේ මේ අභිමතාර්ථය මුදුන්පත් කරගනු වස් 1861 දී හේ කශුනොමියා කුමාරිකාවත් ඉයෙමොදි ෂෝගුන්වරයාත් විවාහ කරවීමට ප්රයත්න දැරීය. මේ ක්රියාව නිසා හේ 1863 දී රාජසභාවෙන් නෙරපනු ලැබීය. පසුව මොහුගේ මූලිකත්වයෙන් කෝමෙයි අධිරාජයා වස දී මරුමුවට පත් කරන ලදි. 1867 දී ෂෝගුන් පාලනය බිඳ වැටීමෙන් පසු අභිනවයෙන් පිහිටුවන ලද අධිරාජ ආණ්ඩුවෙහි තනතුරු රාශියක් දරා පසුව 1871 දී විදේශ කටයුතු භාර අමාත්ය ධුරයට පත් වූයේය. ඔහු දූත පිරිසක නායකයා වශයෙන් යුරෝපයේත් ඇමෙරිකාවේත් සංචාරය කෙළේ එම වර්ෂයේ දී මය. 1873 දී කොරියාවට විරුද්ධව යුද්ධ ප්රකාශ කිරීමට සාර්ථක ලෙස කැබිනට් මණ්ඩලය පොලඹවාගත් ඉවාකුරා රාජ්ය කටයුතු සියල්ලක දී ම ප්රමුඛස්ථානය ගෙන ක්රියා කෙළේය. ඔහුගේ අභාවයෙන් පසු ඔහුට දාජෝ දායිජින් හෙවත් අමාත්ය-ප්රධාන නාමය පිරිනමන ලදි.
(සංස්කරණය: 1970)
