ඉවාන් III
(1440-1505). මස්කොවි උපරාජධානියේ මහාදිපාද (ග්රෑන්ඩ් ඩ්යුක්) පදවිය ඉසුලූ වසිලියෙවිච්ගේ පුත්රයකු වූ මෙතෙම 1440 දී ජන්මලාභය ලැබීය. සිය පියා ඇවෑමෙන් 1462 දී බලයට පැමිණි ඔහුගේ පාලන සමයේ මුල් අවධියේ දීම නොව්ගොරොද් සමූහාණ්ඩුවට පහර දෙන්නට පටන් ගෙන 1478 දී එය සම්පූර්ණයෙන් ම අත්පත් කරගත්තේය. යාරොස්ලාව්ල්, රොස්ටොෆ් සහ ට්වේර් යන අවශේෂ රාජධානි ද පිළිවෙළින් 1463, 1474 සහ 1485 යන අවුරුදුවල දී අල්ලාගන්නා ලදි. 1500 දී ලිතුවේනියන්වරුන් පරදවා නගර කිහිපයක් ම අල්ලාගැනීමට ඉවාන් සමත් විය.
ටාටර්වරුන්ගේ බලපෑම්වලින් මස්කොවි උපරාජධානිය ගළවාගත් ඉවාන්, කෂාන් නම් ප්රදේශය ද සිය ආධිපත්යය යටතට ගෙන 1495 දී තුර්කියේ සුල්තාන්වරයා සමග තානාපති සබඳකම් පිහිටුවා ගත්තේය.
තෙවැනි ඉවාන්ගේ සමයේ දී මස්කොවි රාජ්යයේ පාලනය ඒකාධිපති ස්වෛරී ස්වරූපයක් ගන්නට විය. ප්රථම රුසියානු නීති සංග්රහය සම්පාදනය කරන ලද්දේ ඉවාන්ගේ කාලයේ දීය. විදේශීය කාර්මිකයන්ට හා ශිල්පීන්ට රුසියාවට පැමිණ පදිංචිවීමට ද ඔහු අනුබල දුන්නේය.
(සංස්කරණය: 1970)
