තයිෂෝ ඉෂිශාකා
(1896- ). වත්මන් ජපානයේ ප්රමුඛ ස්ථානයේ වැජඹෙන ව්යාපාරිකයෙකි. ජපානයේ ව්යාපාරක්ෂේත්රයෙහි ලා මොහුගේ බලපෑම කොතරම් ද යත හොත් ඕනෑ ම ප්රධාන ආර්ථික යෝජනා ක්රමයකට මොහුගේ අනුමතිය හෝ සහයෝගය ලබාගැනීම වැදගත් කොට සලකනු ලැබේ.
තෝකියෝහි උපන් තයිෂෝ ඉෂිශාකා 1911 දී තෝකියෝ අධිරාජ්ය විශ්වවිද්යාලයයේ නීති අංශයෙන් උපාධි ලැබ රජයේ සේවයට බැඳී එහි උසස් තනතුරු කිහිපයක් දැරීය. එකුන්තිස් වියේ දී රජයේ සේවයෙන් අස් වී ව්යාපාරක්ෂේත්රයට බට ඉෂිශාකා එතැන් පටන් ජපානයේ නොයෙක් ප්රමුඛ ව්යාපාරයන්හි නායකත්වය දරන්නට විය. දැන් මෙතෙමේ විවිධ ව්යාපාරික සංවිධාන හැටකටත් අධික සංඛ්යාවක උපදේශක, අධ්යක්ෂ, සභාපති ආදි වශයෙන් ප්රධාන තනතුරු දරයි. 1956 දී ජපානයේ නිෂ්පාදකයන්ගේත් ව්යාපාරිකයන්ගේත් ප්රධාන ජාතික සංවිධානය හා ජපානයේ ආර්ථික ජීවිතයේ ප්රාණනාළිය ද වූ ආර්ථික සංවිධාන සංයුක්ත සංගමයේ සභාපති වශයෙන් ඒකච්ඡන්දයෙන් තෝරාපත් කරගනු ලැබුවේය. දැන් මොහු එහි සභාපති වශයෙන් සේවය කරනුයේ හවැනි වරටය.
ව්යාපාරික කටයුතු හැරුණු විට ඉෂිශාකා නොයෙක් සමාජසේවා කටයුතුවල ද යෙදෙයි. හේ ජපානයේ රතුකුරුස සංගමය, බාලදක්ෂ ව්යාපාරය, තෝකියෝ ඔලිම්පික් පදනම ආදි ආයතනවල ප්රබල අනුග්රාහකයෙකි. ක්රීඩාලෝලයකු හා කලාරසිකයකු ද වූ ඉෂිශාකා බොහෝ විට ගොල්ෆ් වැනි ක්රීඩාවල ද චිත්රනයෙහි - විශේෂයෙන් අභිලේඛනයෙහි - ද ව්යාවෘත වෙයි.
(සංස්කරණය: 1970)
