ඉලේතියා

මිසරයේ නයිල් නදී තීරයෙහි පිහිටි පැරණි නගරයකි. වර්තමානයෙහි මෙය එල් කාබ් නමින් හඳුන්වනු ලැබේ. උතුරු මිසරයේ ආරක්ෂක නෙඛෙබෙත් නමැති දෙව්දුව ඉලේතියා නගරයට ද අධිපති වූවාය. දෙවන රැමසිස් (ක්‍රි.පූ. 1292-1225 පමණ) රජු විසින් තනවන ලද කුඩා දේවමන්දිර කිහිපයක ද තුන්වන ආමෙන්හෝටෙප් (ක්‍රි.පූ. 1411-1375 පමණ) රජු විසින් ප්‍රාදේශික දේවතාවන් වෙනුවෙන් කැප කරන ලද දේවමන්දිරයක ද නටබුන් මෙහි දක්නට ලැබේ. නෂ්ටාවශේෂ අතර වඩාත් වැදගත් වන්නේ පර්වතය හාරා සාදන ලද රාජකීය සොහොත් ගැබ්ය. සමහර සොහොන් ගැබ් 13 වන මිසර රාජවංශ යුගය තරම් පැරණිය. මිසර රජවරුන් හා හික්සොස් වැනි අනිකුත් ආසියාතික වර්ගයන් අතර පැවැති යුදකෝලාහල ආදිය පිළිබඳ වාර්තා ද තත්කාලීන සමාජය පිළිබිඹු කෙරෙන විසිතුරු සිතුවම් ද මෙම සොහොන් ගැබ් තුළ දක්නට ලැබේ. ගඩොලින් වට කොට බඳනා ලද අගනා බලකොටුවක් ද නගරය තුළ විය.

(සංස්කරණය: 1970)