ඇනෝඩය

(Anode). විද්‍යුත්-විච්ඡේදනයේ (විද්‍යුත්-විච්ඡේදනය බ.) දී විද්‍යුත්-විච්ඡේද්‍ය (electrolytic) ද්‍රාවණය ඇතුළට විද්‍යුත් ධාරාව ගෙන ගොස් එයින් පිටතට ගෙන යන කූරුවලට හෝ තලවලට ඉලෙක්ට්රෝඩ යයි කියනු ලැබේ. බැටරියේ ධන ධ්‍රැවයට සම්බන්ධ කර තිබෙන ඉලෙක්ට්රෝඩයට ඇනෝඩය යයි කියනු ලැබේ. සෘණ ධ්‍රැවයට සම්බන්ධ කර තිබෙන ඉලෙක්ට්රෝඩය කැතෝඩය (බ.) නමින් හැඳින්වේ. විද්‍යුත්-විච්ඡේදනය වන විට සෘණ ආරෝපණයක් සහිත ඇනයන (බ.) ඇනෝඩය කරා යයි. ධන ආරෝපණයක් සහිත කැටයන (බ.) කැතෝඩය කරා යයි. සෝඩියම් ක්ලෝරයිඩ්වල විද්‍යුත්-විච්ඡේදනයේ දී ක්ලෝරීන් ඇනයන ඇනෝඩය කරා යයි.

(සංස්කරණය: 1967)