ඇන්ටිගුවා දූපත
බටහිර ඉන්දියා දූපත්වල ලීව'ඩ් දිවයින් රැසෙහි පිහිටි වර්ග සැතපුම් 108ක් විශාල දිවයිනකි. මෙහි උතුරෙහි හුනුගලින් සෑදුණ සානුවක් ද නිරිතදිග කෙළවරෙහි අඩි 1,330ක් උස ගිනිකඳු මුදුනක් ද වෙයි. සාමාන්ය වාර්ෂික වර්ෂාපතනය අඟල් 45ක් පමණ වුවත් දිවයිනෙහි දේශගුණය සාමාන්යයෙන් වියළි නිසා මෙහි ගංගා දුලබය. උල්පත් ද අවුරුද්ද මුළුල්ලේ නොපවතී. නිතර ම නියං ඇති වන හෙයින් උක්, කපු ආදිය වගා කරනු ලබන්නේ ජල සම්පාදන ක්රමවල ආධාරයෙනි. කඩතොලු සහිත වෙරළක් ඇති මෙහි ආරක්ෂා සහිත තොටවල් කීපයක්ම තිබේ.
මේ දිවයින පළමුවෙන් සොයාගනු ලැබුවේ (1493) කොලම්බස් විසිනි. 1632 දී මෙය බ්රිතාන්ය ජනපදයක් බවට පත් විය. ඇන්ටිගුවා දූපත 1666 දී ප්රංස ජාතිකයන් විසින් අල්ලාගනු ලැබූ නමුත් බ්රිතාන්යයට ආපසු පවරන ලදි. 1940 සිට ඇමෙරිකා එක්සත් ජනපද රාජ්යය 99 අවුරුදු බද්දක් පිට පාර්හම් අසල නාවික කඳවුරක් පිහිටුවා ගෙන තිබේ.
දිවයිනේ සාමාන්ය ජනගහනය වූ (1961) 63,190න් බහුතර කොටස නීග්රෝවරුය. 21,000ක ජනගහනයකින් යුත් සාන්ත ජෝන්ස්, ඇන්ටිගුවාවේ විශාලතම නගරය ද අගනුවර ද ප්රධාන වරාය ද වේ.
(සංස්කරණය: 1967)
