උඩැක්කි උපත

උඩැක්කි නම් බෙර විශේෂයෙහි පුවත පැවසෙන කවි පන්තියකි. සක් දෙවිඳුගේ ඇරයුමෙන් විස්කම් දෙවියන් නඳුන් උයනේ වූ සඳුන් රුකකින් කපාගත් අරටුවෙන් කළ බෙර කඳින් ද මාතලී දෙව්පුතු ගෙන ආ සම් කඩින් ද උපුල්වන් දෙවියන් මවාලූ ගැටිවැල් දෙකින් ද යුක්ත කොට සාදන ලද උඩැක්කිය මිනිසුන්ට යකුන්ගෙන් පැමිණෙන ලෙඩරෝග දුරු කරනු පිණිස ඊශ්වර දෙවියන් මෙලොවට දුන් පරිදි ඉන් කියැවෙයි. කවි එකොළොසකින් යුත් වූ මේ කවි පන්තිය කවිපතක් ලෙස සැපැයූ බව කවියා කියයි. හත්අඩි පුවත හා සමඟ පොතක් වශයෙන් පළ කරවා තිබීම නිසා එය පොත් සංඛ්‍යාවෙහි ලා සඳහන්ව තිබේ. උඩැක්කිය වැයීමෙන් කැරෙන ශාන්ති කර්මයෙහි දී කියනු පිණිස එය සපයා ඇත.

(සංස්කරණය: 1970)