උඩුකිඳ
ඌව පළාතේ බදුලු දිස්ත්රික්කයෙහි ආදායම් පාලක කොට්ඨාසයකි. උඩුකිඳ කොට්ඨාසය ජල ප්රදේශයන් හැර ව.සැ. 184ක් පමණ විශාලය. ගම්පහ, මැද පළාත, යටි පළාත, මහ පළාත, උඩ පළාත, දෙහිවිනි පළාත හා දඹවිනි පළාත යනුවෙන් මෙය කෝරළ හතකට බෙදේ. බටහිරින් පිදුරුතලාගල වැටියෙන් ද දකුණින් හපුතලේ කඳුවලින් ද වට වන උඩුකිඳ ඌව ද්රෝණියෙහි කොටසකි. ඉලුක්, මාන ආදි තෘණ වර්ග සහිත පතන්වලින් වැසීගිය කඳුගැට මෙම ප්රදේශයෙහි විශේෂ භූ ලක්ෂණයකි. මෙහි දේශගුණය වියළිය. උඩුකිඳ ප්රදේශයේ උතුරු දෙසට ගලන උමා ඔය හා එහි අතු ගංඟා ප්රදේශවාසීන් ජලය ලබාගන්නා ප්රධාන ජල මාර්ග වේ. අඹේවෙල ජලාශ යෝජනා ක්රමය මගින් උඩුකිඳ ප්රදේශයේ ගොවිතැන් කටයුතුවලට වාරිමාර්ග පහසුකම් සැපයීම 1967 දී අරඹනු ලැබීය.
මෙහි ප්රධාන වැවිල්ල තේය. තේ අක්කර 42,000ක් පමණ මෙහි ඇත. වී හා එළවළු ගොවිතැන මෙහි වැසියන්ගේ වැදගත් ආදායම් මාර්ගයකි.
බණ්ඩාරවෙල, වැලිමඩ හා දියතලාව උඩුකිඳ කොට්ඨාසයට අයත් සැලකිය යුතු නගරය.
(සංස්කරණය: 1970)
