උඩුකිරිවිල වැව

දකුණු පළාතේ ගිරුවා පත්තුවෙහි වීරකැටියට මඳක් උතුරින් පිහිටි වැවකි. ඌරුබොක්ක ඔය මෙයට සම්බන්ධ ව ඇත. පැරණි වැවක් නමුදු මෙහි ඉතිහාසය අවිනිශ්චිතය. නවීන ක්‍රමානුකූලව 1861 දී මෙහි ප්‍රතිසංස්කරණ කටයුතු නිම කරන ලදි. මුදුන අඩි 15ක් පළල් වූ මෙහි වැව්කණ්ඩිය දිගින් අඩි 3,300කි. අක්කර අඩි 3,224ක ධාරිතාව සහිත මෙම වැව සම්පූර්ණයෙන් පිරුණ විට අක්කර 650ක් පමණ වූ ප්‍රදේශයක් පුරා පැතිරේ. වැවෙහි පෝෂක ප්‍රදේශය වර්ග සැතැපුම් 10ක් පමණ වේ. මෙම වැවෙන් ජලය සැපයෙන අක්කර 3,940ක් පමණ වූ ගොවිබිම් වැඩි වශයෙන් වී වගාව සඳහා යොදා ඇත. උඩුකිරිවිල ගම වැවට උතුරු දිගින් පිහිටා ඇත.

උඩුකිරිවිල වැවෙහි ජලය හා මූකිරිගල ගල් පොකුණෙහි ජලය අතර සම්බන්ධකම් කියන කථාවක් ඇතැම් වදුලුපොත්වල ඇත.

(සංස්කරණය: 1970)