උන්කෙයි
ජපානයේ කමාකුරා යුගයේ (1185-1333) විසූ උසස් මූර්ති ශිල්පියකු වූ මොහු ජපන් මූර්ති කලාවේ නවෝදයක් ඇති කළ අයෙකි. මෙතෙම සුප්රසිද්ධ කෝකෙයි නමැති මූර්ති ශිල්පියාගේ ශිෂ්යයෙක් විය.
කමාකුරා යුගයේ දී ඇති වූ තාත්වික කලා සම්ප්රදායයේ ආරම්භකයා ලෙස සලකනු ලබන මොහු නිසා නව සම්ප්රදායයේ සංවර්ධනයක් ඇති විය. එන්ජෝජි විහාරයේ දක්නට ලැබෙන වෛරෝචන බුද්ධ ප්රතිමාව උන්කෙයිගේ උසස් කෘතියකි. මොහු තරුණ වියේ දී නිමැවූ මෙම කලාකෘතියෙහි පාරම්පරික සම්ප්රදායයේ හා තාත්වික සම්ප්රදායයේ සංකලනයක් දැක්ක හැකිය. තෝදායිජි විහාරයේ දකුණු දොරටුවෙහි තනවා ඇති කොන්ගෝ රිකිෂි නමින් හැඳින්වෙන යෝධ ප්රතිමා දෙක හා කෝෆුකූජි විහාරයේ නිමවන ලද මෛත්රෙය බෝධිසත්වරූපය ද අසංග හා වසුබන්ධු යන භාරතීය බෞද්ධාචාර්යවරයන්ගේ ප්රතිමා ද තාත්වික සම්ප්රදාය පිළිබිඹු කරවන උන්කෙයිගේ උසස් ම කෘතීහුය. ලීයෙන් නිමවන ලද මෙම මූර්තීන් තැනීමේ දී කායිකෙයි (බ.) වැනි සමකාලීන මූර්ති ශිල්පීන්ගේ සහයෝගය ද උන්කෙයිට ලැබිණ.
තාන්කෙයි, ජෝකෙයි, කෝබෙන් හා කෝෂෝ යන ප්රසිද්ධ කමාකුරා මූර්ති ශිල්පීහු උන්කෙයිගේ පුත්රයෝ වූහ. මොවුන් නිසා කමාකුරා මූර්ති ශෛලියේ ඉමහත් දියුණුවක් ඇති විය.
(සංස්කරණය: 1970)
