ඇන්ටෙනාව

(ගුවන් කම්බිය). රේඩියෝ මාර්ගයෙන් ප්‍රචාරයක් කිරීමේ දී සම්ප්‍රේෂකයේ (transmitter) උපදවනු ලබන විදුලි ශක්තිය අවකාශයට එල්ල කර සෑම දිසාවක ම පතුරුවා යැවිය යුතුය. රේඩියෝ සංඥා ලබා ගන්නා ස්ථානයේ දී තරංගාකාරයෙන් පැතිරී යන ඒ විදුලි ශක්තියෙන් කොටසක් අහුලාගෙන සංඥා ලබන උපකරණයේ පරිපථවලට (circuits) පවරා දිය යුතුය. සම්ප්‍රේෂකයේ උපදවනු ලබන බලය හාත්පස පතුරුවා යවන්නේත් සංඥා ලබා ගන්නා ස්ථානයේ දී ඒවා අහුලා ගන්නේත් ඇන්ටෙනාවය. ඇන්ටෙනාවල ප්‍රමාණයත් හැඩයත් විවිධය. සංඥා ලබාගන්නා උපකරණයේ පාවිච්චිවන ඇන්ටෙනාව කොට කම්බියක් පමණක් විය හැකිය. විශාල සම්ප්‍රේෂකවල කම්බි පද්ධතියක් හෝ වානේ අටලු හෝ තිබිය හැකිය.

විදුලි ශක්තිය විහිදුවා හැරීම අතින් ඇන්ටෙනාවක් දක්වන කාර්යක්ෂමතාව එහි දිග ප්‍රමාණය ද වින්‍යාසය ද පිහිටීම ද උඩ රඳා පවතී. ඇන්ටෙනාවේ දිග ප්‍රමාණය රේඩියෝ සංඥාවේ තරංග ආයාමයෙන් සෑහෙන තරම් කොටසක් වූ තරමට සංඥා පැතිරී යෑම වඩා හොඳ බව සොයාගෙන තිබේ.

කොට කම්බි කෑල්ලක් පවා රේඩියෝ තරංග අහුලා ගන්නා සාමාන්‍ය ඇන්ටෙනාවක් ලෙස ගත හැකි නමුත් විදුලි ශක්තිය ඇදගන්නා වස්තු- වලින් ඈත්ව එළිමහනෙහි පිහිටි තරමක් දිග කම්බියක් පාවිච්චි කළහොත් අහුලා ගන්නා සංඥාව වඩා බලවත්ය. එහෙත් අහුලා ගන්නා අනභිමත ඝෝෂාව ද වැඩිය. වඩා දිග ඇන්ටෙනාවක් පාවිච්චි කරන කල අනභිමත ඝෝෂා නිසා ගුවන් විදුලි ප්‍රචාරය සතුටුදායක ලෙස අසන්නට නුපුළුවන් විය හැකිය.

(සංස්කරණය: 1967)