ඇපමියා

සුළු ආසියාවේ මෙනමින් හඳුන්වන ලද පැරණි නගර තුනක් මෙහි පහත විස්තර වේ.

ඇපමියා අඩ් ඔරොන්ටෙම්‍

බටහිර සිරියාවේ ඔරොන්ටීස් ගඟබඩ පිහිටියේය. සෙලූකස් නිකේටර් රජු (ක්‍රි.පූ. 280) විසින් සිය මෙහෙසිය වූ ඇපමා සිහි වනු පිණිස මෙය කරවන ලදි. එකල මෙය සෙලූසිඩ් රජවරුන්ගේ යුද කඳවුරක් ද විය. 7 වන සියවසේ දී දෙවන කොස්රූ නම් පර්සියානු රජු විසින් විනාශ කරන ලදුව නැවත ගොඩනැංවූ ඇපමියා නගරය 1152 දී සිරියාවේ ඇති වූ භූමි කම්පාවක් නිසා සම්පූර්ණයෙන් ම විනාශයට පත් විය. බෙල්ජියන් පුරාවිද්‍යාඥයන් මේ නගරය කැණීමේ දී මතු වූ නටබුන් අතර දර්ශනීය මහා වීථියක් ද විශාල නෘත්‍ය මණ්ඩපයක් ද යුදෙව්වරුන්ගේ ධර්ම ශාලාවක් හා ක්‍රිස්තියානි දේව මන්දිරයක් ද විය.

ඇපමියා සිබෝටස්

සුළු ආසියාවේ ෆ්‍රිජියා ප්‍රදේශයට අයත් නගරයකි. මියැන්ඩර් නදිය අසල පිහිටි මෙම නගරය ඇන්ටියෝකස් සෝටේර් (ක්‍රි.පූ. 280-261) නම් සිරියානු රජු විසින් සිය මෑණියන් සිහි වීම පිණිස කරවන ලද්දේය. ක්‍රි.පූ.133 දී මෙය රෝමවරුන් විසින් අල්ලා ගන්නා ලද නමුදු ඔවුන්ගේ ආධිපත්‍යය මෙහි බලපැවැත්තේ ක්‍රි.පූ. 1 ශතවර්ෂයේ දී සිදු වූ මිත්‍රිඩේටිස්ගේ යුද්ධවලින් පසුවය. එකල ඇපමියා නගරය විශාල වෙළෙඳ මධ්‍යස්ථානයක් වශයෙන් ද ප්‍රසිද්ධියක් ඉසිලීය. කොන්ස්තන්තිනෝපල් නගරය ප්‍රධාන වෙළෙඳ මධ්‍යස්ථානය වීමෙන් පසු ඇපමියා නගරය පරිහානියට පත් විය. 1070 දී මෙය තුර්කියට යටත් විය. 13 වන සියවසේ දී මුස්ලිම් ආධිපත්‍යය යටතට පැමිණි මෙම නගරය භූමිකම්පාවකින් විනාශයට පත්විය. ග්‍රීක හා රෝම ශිලාලේඛන රාශියක් මෙහි තිබී සොයාගන්නා ලදි.