උෆීත්සි
ඉතාලියේ ටස්කනියේ අගනුවර වූ ෆ්ලොරන්ස්හි පිහිටි සුප්රකට මාළිගාවකි. මෙදිචි පෙළපතට අයත් පළමුවන කොසීමෝ නම් ප්රධානියකු වෙනුවෙන් රාජ්යපාලන හා අධිකරණ කටයුතු උදෙසා වසාරි නම් ගෘහනිර්මාණ ශිල්පියා විසින් මෙම ගොඩනැඟිල්ල මුලින් සාදන ලද්දේය (1560-74). ටස්කනියේ රාජ්යලේඛනාගාරය හා උෆීත්සි කලාගාරයෙහි ලොව ඇති විශිෂ්ටතම කලාකෘති එකතුවක් වෙයි. විශේෂයෙන් ෆ්ලොරන්ස් හා වැනිස් චිත්රකලා සම්ප්රදායට අයත් උසස් නිර්මාණ රාශියක් ද වෙනත් චිත්ර, මූර්ති හා මාණික්ය වර්ග ද මෙහි තැන්පත් කොට ඇත. ආර්නෝ නදියෙන් එගොඩ පිහිටි පිත්ති මාළිගාව (Palazzo Pitti) නම් වූ තවත් කලාගාරයක් සමග උෆීත්සි මාළිගාව සැතැපුමක් පමණ දික් වූ ආච්ඡන්න පථයකින් (corridor) සම්බන්ධ වේ. එම කලාගාරයේ ද සම්භාවනීය චිත්ර හා මූර්ති රැසක් ඇත. දෙවන ලෝක සංග්රාම අවධියේ දී ජර්මන්වරුන් විසින් මේ ගොඩනැඟිලි දෙකට ම බලවත් හානි පමුණුවන ලදි.
(සංස්කරණය: 1970)
