අන්තර්මහාද්වීපීය ප්‍රක්ෂේපාස්ත්‍ර
(Intercontinental Ballistic Missiles) වර්තමාන විද්‍යාත්මක කර්මාන්තයන්ගේ දියුණුව කරණකොටගෙන බොහෝ ඈතට එල්ල කළ හැක්කාවූ ද, අතිශයින් විනාශකාරී වූ ද යුද්ධෝපකරණ නිර්මාණය වී තිබේ. සාමාන්‍ය වශයෙන් බෝම්බවලින් කරන පහරදීමක දී මෙන් අහස් යානාවලින් ඒවා ගෙන ගොස් ඉල්කක ප්‍රදේශයක් මත හෙළීමක් වුවමනා නොකරන්නා වූ ද බිම සිට විහිදුවා හළ පසු, ස්වයංක්‍රීය ඉලෙක්ට්‍රොනික උපකරණවලින් ඉලක්කය කරා යොමුවන්නා වූ ද බෝම්බ වර්ග කිහිපයක් පසුගිය යුද්ධයේ අවසන් අවධියෙහි ජර්මනිය පාවිච්චි කළේය. පැයකට හැතැප්ම 3,000කට වඩා වේගයෙන් ගමන් කළ යෝධ රොකට් වෙඩිල්ලක් වූ වී2 (V2) බෝම්බය ඒ බලගතු අවි අතුරින් එකක් විය. මේ බෝම්බ මගින් එංගලන්තයේ නොයෙක් ප්‍රදේශවලට බලවත් හානි පමුණුවන ලදි. ඒවා වඩාත් නිවරද ලෙස ඉලක්කයට එල්ල කළ හැකි වී නම් යුද්ධයෙහි ප්‍රතිඵල වෙනස්වන්නට පවා ඉඩ තුබුණේය.
යුද්ධය අවසාන වීමෙන් පසුව ඇමෙරිකා එක්සත් ජනපදය සහ සෝවියට් රුසියාව යුද්ධෝපකරණ නිෂ්පාදන ක්‍රම අතින් විශාල දියුණුවකට පත්ව සිටී. හැම මහාද්වීපයක ම ඉලක්කවලට එල්ල කළ හැකි වූ නොහොත් සැතපුම් දහස් ගණන් දුර වදින්නා වූ ප්‍රක්ෂේපාස්ත්‍ර දැනට මේ දෙරටෙහි ඇත. ඒවා නිකුත් කොට යැවූ තැන සිට ඉලක්කයට වදින තෙක් වුවමනා පරිදි එල්ල කර යැවීමේ උපක්‍රම බොහෝ දුරට දියුණු කොට තිබේ. යුද්ධයක් ඇවුළුණු විටෙක මේ ප්‍රක්ෂේපාස්ත්‍රවලින් බරපතළ විනාශයක් සිදු විය හැකිය.
කර්තෘ:පී.ජේ. එලියේසර්
(සංස්කරණය:1963)
