අබ්බාස් I (2)

(1813-1854). මිසරයේ පාෂා කෙනෙකි; තුසුන් පාෂාගේ පුත්‍රයාය; මුහම්මද් අලි නම් වූ මිසර පාෂාගේ මුනුබුරෙකි. තම සුළු පිය කෙනෙකුන් වූ ඊබ්‍රාහිම් පාෂා යටතේ මෙතෙමේ සිරියාවේ යුද කටයුතුවල යෙදුණේය. 1848 දී ඊබ්‍රාහිම් පාෂා මියගියෙන් හිස් වූ යුව රජ තනතුර මොහුට හිමි විය. 1849 අගෝස්තු මාසයේ මුහම්මද් අලි මිය ගියෙන් මිසරයේ පාෂා තනතුරට අබ්බාස් පත් විය.

මෙතෙමේ ප්‍රතිගාමියෙකු හා ඉතා ක්‍රෑර පුද්ගලයෙකු හැටියටද ප්‍රසිද්ධය. චිරාගත චාරිත්‍රවලට ගරු කළ තැනැත්තෙකු වූ ඔහු තමාගේ කාලයෙන් ඉතා වැඩි කොටස මාළිගය තුළම ගත කළ බව කියති. මහජන ආයතන නවතා දැමීම, පාසල් වසා දැමීම වෙළඳ ඒකාධිකාරය තහනම් කිරීම වැනි ක්‍රියාවන් කළ ද හෙතෙම ඇලෙක්සැන්ඩ්රියාවේ සිට කයිරෝ නගරය දක්වා දුම්රිය මාර්ගයක් තැනීමට බ්‍රිතාන්‍යයන්ට ඉඩ දුන්නේය. අබ්බාස්ගේ දරුණුකම් ගැන කලකිරුණු ඔහුගේ වහලුන් දෙදෙනෙකු විසින් මාළිගය තුළදීම 1854 දී ඔහු මරණයට පත් කරන ලදි.

(සංස්කරණය:1963)