අබ්සලොම්
සිංහල විශ්වකෝෂය වෙතින්
බයිබලයේ (සාමුවෙල්ගේ දෙවෙනි පොතේ) සඳහන් වන විශිෂ්ට රූසපුවකින් හෙබි රජ කුමරෙකි. දාවිත් රජුගේ ප්‍රියතම පුත්‍රයා වූ මොහු තාමර් නමැති තම රූමත් සොහොයුරිය දූෂණය කළ ස්වකීය වේමාතික සහෝදරයා වූ අම්නොන් කුමරුගෙන් පළිගැනීම් වස් ඔහු මැරවීය. ඉන් පසු තුන් වසරක් රටින් පිටවී හුන් අබ්සලොම් ආපසු පැමිණ යෝවබ් නම් සෙනෙවියාගේ අනුග්‍රහයෙන් පිය රජු යළිත් තමා කෙරෙහි පහදවා ගත් නමුත් අනතුරුව රජුට විරුද්ධව කුමන්ත්‍රණය කළෙන් පිය පුත් දෙදෙනා අතර සටනක් විය. මුලින් ජයග්‍රහණය කළ තම සේනාව කෙළවර දී විනාශ වී යනු දුටු අබ්සලොම් අශ්වතරයෙකු පිට නැගී පලා යන අතර ඔහුගේ හිස ආලෝන ගසකට හිර වී ඔහු අහසටත් පොළොවටත් අතර එල්ලී සිටියදී යෝවබ් අතින් මැරුම් කෑවේය. තම ප්‍රිය පුත්‍රයාගේ මරණය කරණකොටගෙන දාවිත් රජු තුළ හටගත් ශෝකය තමනුත් රාජ්‍යයත් නිරුපද්‍රිත වීමෙන් පවා තුනී නොවීය.
(සංස්කරණය:1963)
