අබුල් හසන්
සිංහල විශ්වකෝෂය වෙතින්
(1589-1630) ඉන්දියාවේ ජහාන්ගීර් රජු දවස විසූ මුස්ලිම් ජාතික චිත්‍ර ශිල්පියෙකි. ඔහු මෙලොව එළිය අක්බාර් මාළිගයහිය දී ය. ඔහුගේ පියා හෙරාට්හි පර්සියානු චිත්‍ර ශිල්පියෙක් විය. ප්‍රථමයෙන් අක්බාර් රජු යටතේ සේවය කරමින් ප්‍රතිරූප සිතුවම් කිරීමෙහි විශේෂ දක්ෂතාවයක් දැක් වූ අබුල් හසන් අක්බාර්ගෙන් පසු රජ පැමිණි ජහාන්ගීර් විසින් "නදීර් අස් සමාන්" නාමයෙන් සම්මාන කරනු ලැබීය.
"ජහාන්ගීර්-නාමා" සංග්‍රහයෙහි මෙම ශිල්පියා ගැන මහත් ප්‍රශංසාවක් කර තිබේ. ඔහු විසින් සිතුවම් කරන ලද ප්‍රතිරූපවලින් තාත්වික චිත්‍ර නිරුපණයෙහි ඔහුගේ සාමර්ථ්‍යය හෙළිවේ. ඔහුගේ නිර්මාණයන් අතර ස්වභාවික දර්ශනයන් නිරූපණය කෙරෙන සිතුවම් කිහිපයක් ද වේ. අබුල් හසන්ගේ චිත්‍රයන්හි රාජ්පුත්, පර්සියානු හා චීන චිත්‍ර කලා සම්ප්‍රදායන්ගේ සාර්ථක සංකලනයන් දැක්ක හැකිය.
(සංස්කරණය:1963)
