අභිවෘද්ධි ආලේපය
කතෝලික සභාවේ සක්‍රමේන්තු හෙවත් දේවප්‍රසාද නිධාන සතක් ඇත්තේය. බව්තීස්මය හෙවත් ඥානස්නානය ප්‍රථම දේව ප්‍රසාද නිධානය වේ. ශුද්ධ වූ සභාව තුළ ජේසුස් ස්වාමීන්වහන්සේගේ ජීවනයට දරුවකු ප්‍ර‍වේශ කරන පිළිවෙතෙකි මේ. එයින් දරුවා දේව ජීවනය නමැති ලෝකෝත්තර ජීවනයක් ලබයි. ආධ්‍යාත්මික ලෙස නැවත උපදී. මෙසේ නැවත උපන් දරුවා ආධ්‍යාත්මික ලෙස වර්‍ධනය වී, ශක්තිමත් වී, වැඩිවිය පැමිණිය යුතුයි. මෙය සිදුවනුයේ අභිවෘද්ධි ආලේපය නමැති දේවප්‍රසාද නිධානයෙනි. මේ දේවප්‍රසාද නිධානයෙන් ඇතිවන ප්‍රතිඵලය නම් දරුවාට හුදෙක් බාහිර දේවාධාරයක් ලැබීම නොව දේව ජීවනය ඔහුගේ ආත්මය තුළට බහුලව ලැබීමය.
ජේසුස් ස්වාමීන්වහන්සේ අභිවෘද්ධි ආලේපය ස්ථාපනය කළසේක. උන්වහන්සේ මෙලොවෙහි සිටිය දී තමන්වහන්සේගේ ගෝලයන් පිට ශුද්ධාත්මයාණන්වහන්සේ එවන බවට කිහිප වරක් පොරොන්දු වූ සේක. "මම පියාණන්වහන්සේ ගෙන් ඉල්ලන්නෙමි; එවිට ඔබ සමග සදාකල්හි වාසය කරනු පිණිස වෙන සැනසිලිකාරයාණ කෙනකුන් දෙවාවදාරන්නාහ. ඒ කවරෙක්ද යත් සත්‍ය‍තාවේ ශුද්ධාත්මයාණන්වහන්සේය" (ජුවම් 14, 16) තවද ජේසුස් ස්වාමීන්වහන්සේ ස්වර්ගාරෝහණය කිරීමට පෙර ගෝලයන් අමතා "ඔබ වෙත වැඩමකරන්නා වූ ශුද්ධාත්මයාණන්ගේ අනුභාවය ඔබට ලැබෙන්නේය"යි වදාළසේක (ක්‍රියා 1, 8)
ජේසුස් ස්වාමීන්වහන්සේ ස්වර්ගාරෝහණය කොට දස දිනකට පසු ශුද්ධාත්මයාණන්වහන්සේ ජේසුස් ස්වාමීන්වහන්සේගේ ශ්‍රාවකයන් වෙත බැස වැඩි සේක. ඔවුනට ලැබුණ ශුද්ධාත්මයාණන් වහන්සේ අන්‍යයනට දීමට ඔවුනට බලය දී තිබුණ බව ද ශුද්ධ ලියවිල්ලෙන් පෙනී යේ. සමේරියාවේ ජනයා ක්‍රිස්තු ලබ්ධිය වැලඳ ගත් බව ඇසූ පේදුරුතුමා ද ජුවාම්තුමා ද එහි ගොස් ඔවුනට ශුද්ධාත්මයාණන් ලැබෙන පිණිස යාච්ඤා කළෝය. ඔවුන් ඥානස්නානය ලබා සිටි නමුත් ඔවුන්ගෙන් කිසි‍වකු වෙත ශුද්ධාත්මයාණන්වහන්සේ එතෙක් බැස නොවැඩි සේක. ශුද්ධ වූ පේදුරුතුමා හා ජුවාම්තුමා ඔවුන් පිට අත් තැබූ විට ඔව්හු ශුද්ධාත්මයාණන් ලබාගත්තෝය (ක්‍රියා 8,15-17).
අභිවෘද්ධි ආලේපය නමැති දේවප්‍රසාද නිධානය සාමාන්‍යයෙන් දෙනු ලබනුයේ රාජගුරු ප්‍රසාදිවරයකු විසිනි. එතුමා දෙඅත් දිගුකර යාච්ඤා කළ පසු එකිනෙකාගේ හිස පිට අත තබා ශුද්ධ වූ තෛලයෙන් නළල ආලේප කරමින් "පිතාගේත් පුත්‍රයාගේත් ස්ප්‍රීතු සාන්තුගේත් නාමයෙන් කුරුසියේ ලකුණෙන් ඔබ සලකුණු කරමි. ගැළවීමේ තෛලයෙන් මම ඔබ ස්ථිර කරමි"යි කියයි. අත් තැබීම ශුද්ධාත්මයාණන්වහන්සේ බැස වැඩීමේ ලකුණෙකි. තෛලයෙන් ආලේප කිරීම ආත්මය තුළට ශුද්ධාත්මයාණන් වහන්සේගේ වරප්‍රසාදයෙන් ලැබෙන ශක්තියේ ලකුණෙකි.
අභිවෘද්ධි ආලේපය දෙනු ලබනුයේ දරුවා ළදරු විය ගෙවා ළමා ජීවිතයට පා තබන අවස්ථාවෙහි දීය. ලෝ‍කයේ නරක ආදර්‍ශයන් මැද ඥානස්නානයෙන් ලත් දේව ජීවනය ආරක්ෂා කර ගැනීමට විශේෂ ශක්තියක් අවශ්‍ය වනුයේ මේ කාලයේ දීය. අභිවෘද්ධි ආලේපයෙන් ආත්මය තුළ නොමැකෙන ලාංඡනයක් පදිංචි වන හෙයින් මේ දේවප්‍රසාද නිධානය ලබාගත හැක්කේ එක වරක් පමණකි.
අභිවෘද්ධි ආලේපය මගින් ආත්මය තුළට වැඩම කරන ශුද්ධාත්මයාණන්වහනසේ සමඟ ම උන්වහන්සේගේ දීමනා සතක් අත්වන්නේය. මේ දීමනා සත නම් ප්‍රඥාව, තේරුම් ගැනීම, දැන ගැනීම, දැනමිතිකම, ධෛර්‍ය්‍යය, දේව භක්තිය හා දේව භය යන මේවාය. මේ දීමනා සත ක්‍රියාවේ යෙදවීම හේතු කොට ගෙන ස්නේහය, ප්‍රීතිය, සමාදානය, ඉවසීම, දයාබරකම, යහපත්කම, දීර්‍ඝ ඉවසීම, ශාන්තදාන්තකම, විශ්වාසවන්තකම, මර්‍ය්‍යාදාව, ව්‍රතභාවය හා පිරිසිදුකම යන විශේෂ ගුණ ලක්ෂණ කිහිපයක් ආත්මයෙහි ඇතිවන්නේය.
කර්තෘ:ඩී.ජේ. ඇන්ටනි පපූජාප්‍රසාදි
(සංස්කරණය:1963)
