අමීර් ඛලීල්
සිංහල විශ්වකෝෂය වෙතින්
පසළොස්වන සියවසේ මුල් භාගයේ විසූ පර්සියානු චිත්‍රශිල්පියෙකි. එකල හෙරාට්හි විසූ ෂා රුක් නමැති රාජ්‍ය පාලකයාගේ රාජ සභාවෙහි සේවය කළ මොහු චිත්‍රශිල්පියෙකු වශයෙන් දෙවැනි වූයේ මනි (බ.) නැමැත්තාට පමණි. සමකාලීන කලාකරුවන්ගේ ගෞරවාදරය දිනා ගත් ඛලීල් කල්පිත කථාවස්තූන් සිතුවම් මඟින් නිරූපණය කොට දැක්වීමෙහි මනා පරිචයක් ඇත්තෙක් විය. ටෙහෙරාන් (ටිහිරන්) ප්‍රදේශයෙන් සොයා ගත් "කලිලා ව දිම්නා" නම් වූ චිත්‍රය ඛලීල්ගේ උසස් සිතුවමක් ලෙස සැලකේ.
පසළොස්වන සියවස පමණේ දී පැවැති චිත්‍ර ශෛලිය මුළුමනින් ම පිළිබිඹු කරන මොහුගේ චිත්‍රවල රේඛා ඉතා සියුම්ය; වර්ණ පැහැපත්ය. රූ සටහන් බහුලව යෙදීම හේතුකොට ගෙන සංකීර්ණතාවක් දක්වන මෙම චිත්‍රයන්හි ඊට පැරණි කාලපරිච්ඡේදයන්ට අයත් චිත්‍රයන්හි දක්නා චාම් සරල ස්වභාවය නොපෙනේ.
(සංස්කරණය:1963)
