අල්පොන්සු-V (අප්‍රිකානුවා)
(1432-1481). ආවිස් රාජවංශයට අයිති පෘතුගාලයේ රජෙකි. 1448 දී රාජ්‍ය පාලනයට වන් හෙතෙමේ 1458 දී අප්‍රිකාව ආක්‍රමණය කොට ආල්කාසාර් ප්‍රදේශය යටත් කර ගති. අප්‍රිකානු ආක්‍රමණයන්ගෙන් සාර්ථක ප්‍රතිඵල ලැබූ හෙයින් මොහුට අප්‍රිකානුවා යන විරුද නාමය ලැබණි.
1475 දී අල්පොන්සු රජ පෙරළා පෘතුගාලයට පැමිණ කැස්ටීල් ප්‍රදේශය යටත්කොට ගෙන ඒ ප්‍රදේශයේත් ලියොන් ප්‍රදේශයේත් රජු හැටියට පෙනී සිටියේය. 1475න් පසු රජකම අත්හළ ඔහු සින්ත්‍රාහි පූජකාරාමයට ඇතුළු වූ බව කියති.
අල්පොන්සු රජ රටේ සාහිත්‍ය දියුණුවට බෙහෙවින් අනුග්‍රහ කෙළේය. පෘතුගාලයේ ප්‍රථම පුස්තකාලය කොයිම්බ්‍රාහි පිහිටුවන ලද්දේ මොහු විසිනි. මොහුගේ රාජ්‍ය සමයේ දී වැදගත් දණ්ඩ නීති සංග්‍රහයක් ද සකස් කරන ලද බව කියති. යාත්‍රික හැන්රි (බ.) කුමාරයා විසින් අරඹන ලද නාවික අභ්‍යාස විද්‍යාලයට අල්පොන්සු රජුගෙන් නොයෙක් ආධාරෝපකාර ලැබුණේය.
(සංස්කරණය: 1965)
