අවකාශ ඇඳුම
මිනිසා පෘථිවියෙන් නික්මී අවකාශය කරා ගමන් කරත් ම, සුදුසු විධියේ ආරක්ෂාවක් නැතිව ජීවත්විය නොහැකි අවස්ථාවකට මූණ පෑමට ඔහුට සිදු වෙයි. පෘථිවිය මතුපිට ජීවිතය අවුරුදු කෝටිගණනක් ම පරිණාමයට භාජන වී පවත්නා නිසා එහි වායු පීඩනය සහ උෂ්ණත්වය ආශ්‍රිතව පැන නැඟී තිබෙන අවස්ථාවට අනුකූලව පැවැතීමටත් වර්ධනය වීමටත් පුළුවන් වන විධියට මනුෂ්‍ය ශරීරය හැඩ ගැසී තිබෙයි.
පොළොව මතු පිට පවත්නා තත්වය එසේ වීමට එක් හේතුවක් නම් කීප අතකින් ම ආරක්ෂක පොරෝනයක් වශයෙන් පෘථිවිය හාත්පස පවතින වායුගෝලයයි. ඒ වායුගෝලයේ ගනකම ඉතා ම වැඩි වනුයේ පෘථිවිය මතුපිටයි. වායුගෝලයේ ඉහළට නඟිත් ම එහි ගනකම අඩුවෙයි. එහෙයින් පොළෝ මට්ටමෙන් හැතැප්ම 500කට තරම් ඉහළ දී කිසිදු වාතයක් ඇතැයි කිය නොහැකි තරම්ය.
දවල් කාලයේ දී සූර්ය රශ්මිය අපගේ වායු ගෝලයට වැදුණු විට ඉන් (සූර්ය රශ්මියෙන්) කොටසක් වායුගෝලයට ම උරාගනු ලැබෙයි. මෙහි ප්‍රතිඵලය වශයෙන් ඒ රැස් පෘථිවි පෘෂ්ඨයට වැටෙන්නේ ඒවායේ තීව්‍රතාව බෙහෙවින් අඩු වීමෙන් පසුවයි. වායුගෝලයක් නොතුබුණා නම් පෘථිවිය මතුපිට ඇතිවිය හැකිව තුබූ දිවා උෂ්ණත්වය තරමට දැනට පවතින උෂ්ණත්වය දැඩි නැත්තේ ඒ නිසාය. දවල් කාලයෙහි වායුගෝලයේ රැඳී පවත්නා තාපයෙන් කොටසක් රාත්‍රි කාලයෙහි පහවී යතත්, එය මුළුමනින් ම පහ නොවෙයි. එහෙයින් වායුගෝලයක් නොතුබුණා නම් රාත්‍රී උෂ්ණත්වය අඩුවිය හැකිව තුබූ තරම් ඉතා ම අඩු අංකයට එම උෂ්ණත්වය පහත නොබසියි. මෙසේ දවල් කාලයේ ඇතිවිය හැකි තද උෂ්ණත්වයෙන් ද රාත්‍රි කාලයේ ඇති විය හැකි තද සීතෙන් ද පෘථිවිය ආරක්ෂා කරගන්නේ වායුගෝලයයි.
අප ජීවත්වන්නේ සාගරයක පත්ලේය. එහෙත් ඒ සාගරය ජල සාගරයක් නොව වාත සාගරයක්ය. අප වටා පවත්නා වාතය විසින් අපගේ ශරීරය හාත්පසින්ම තෙරපනු ලබයි. මේ බාහිර පීඩනය සංතුලනය කරන්නා වූ ද පෘථිවි පෘෂ්ඨය මත පවතින පීඩනය යටතේ ශරීරය සුව පහසුවෙන් තබා ගැනීමට යෝග්‍ය ප්‍රමාණයෙන් යුක්ත වන්නාවූ ද යම් යම් බලවේග අපගේ ශරීරාභ්‍යන්තරයෙහි පවතියි.
වාතය මඳ වශයෙන් පවතින්නාවූ ද නොහොත් කිසිසේත් නැත්තාවූ ද සැලකිය යුතු බාහිර වායුපීඩනයක් නැත්තාවූ ද අවකාශයකට අප ගියහොත්, අපගේ ශරීරය පිම්බී ඉදිමී යන්නේය. ලේ රත්වී නටා උතුරා පෙණ නැඟෙයි. එයින් අපේ මරණය ද සිදුවනු ඇත.
තවද සූර්යයාගෙන් නිකුත්වන විකිරණ හා හැම දිශාවකින් පෘථිවිය මත නිතර ම පොද වැස්සක් මෙන් වැටෙන අන්තරීක්ෂ කිරණ (බ.) ආදි විෂම විකිරණ අවකාශයෙහි වෙයි. මනුෂ්‍ය ශරීරය මෙබඳු විකිරණවලට හසුවීමෙන් ශරීර පටකවලට හානි පැමිණිය හැකියි.
එහෙයින් අවකාශතරණයෙහි යෙදෙන්නකුට අවකාශයෙහි පවත්නා උෂ්ණත්වය, වායුපීඩනය සහ විකිරණය යන මේවායින් අවස්ථානුකූලව ආරක්ෂා වනු සඳහා විශේෂ උපක්‍රම අවශ්‍ය වෙයි. අවකාශ ඇඳුම් මේ අවශ්‍ය ආරක්ෂාව සලසාලන උපක්‍රමයකි. මේ ඇඳුම් නානාවිධ අංග ඇතිව නොයෙකුත් වුවමනාවන් පිරිමැසෙන පරිදි පිළියෙල කළ යුතුයි. යමකුගේ ශරීරය හාත්පස තිබිය යුතු පීඩනය ඒ ඇඳුමෙන් සපයාලිය යුතුයි.
ආශ්වාසය පිණිස ඔක්සිජන් සපයනු සඳහාත් විකිරණයෙන් හා අධික ශීතෝෂ්ණ දෙකින් ආරක්ෂාව සලස්වනු සඳහාත් අවශ්‍ය උපකරණ පුළුපුළුවන් හැටියට එහි සවි කොට තිබිය යුතුයි. සුදුසු විධියේ අවකාශ ඇඳුම් සැලැස්මක් පිළියෙල කිරීමේ දී විසඳිය යුතු ගැඹුරු ප්‍රශ්න කීපයකි. මේ සඳහා ඉදිරිපත්කොට තිබෙන සැලැස්මවල් බොහෝය. එයින් දෙකක් චිත්‍රවලින් දැක්වෙයි.
(කර්තෘ: සී.ජේ. එලියේසර්)
(සංස්කරණය: 1965)
