අස්ලිස
සිංහල විශ්වකෝෂය වෙතින්
මෙය සත්විසි නැකතින් නවවන නැකතය. සර්පාකාර සටහනක් ඇතිවන පරිදි විහිද ගිය රක්තවර්ණ තාරකා සයකින් යුත් මේ නැකතට හිමි වූ ගණ යෝනි ආදිය නක්ෂත්‍රචූඩාමණි ආදි ග්‍රන්ථවල දැක්වේ. මෙය වරුණ මණ්ඩලයට අයත්ය. ඒ ඒ දිනයන් සමඟ මේ නැකත යෙදෙන විට ඇතිවන අමෘත, සිද්ධි, අව ආදි යෝග ගුණ දෝෂ සංග්‍රහය ආදි ග්‍රන්ථවල විස්තර වේ.
මේ නැකතින් සර්පයකු දෂ්ට කළහොත් අසාධ්‍ය වේ. අස්ලිස නැකත උදාව පවතිද්දී ඇතිවන උත්පාත, මල්වරවීම් ආදිය පිළිබඳ ශුභ හා අශුභ නක්ෂත්‍රචූඩාමණි ආදි ග්‍රන්ථවලින් දතයුතුය.
අස්ලිස නැකතින් උපන්නහුට බුධගේ නක්ෂත්‍ර දශාව පළමුවෙන් ඇති වේ. නැකතේ පාද හතරට ඩි, ඩු, ඩෙ, ඩො, යන අකුරු පිළිවෙළින් හිමි වේ. නාමකරණයේ දී ළදරුවා උපන් නැකත් පාදයට වැටෙන අක්ෂරය මුල් කරගෙන නමක් තැබීමට නියමිතය.
(සංස්කරණය: 1965)
