ඇංගොස්තුරා පොත්ත

(Angostura bark). බටහිර ඉන්දියානු කොදෙව්වල සහ නිවර්තන ඇමෙරිකාවෙහි වැවෙන රුටාසේ කුලයට අයත් කුස්පාරියා ෆබ්රිෆුගා (Cusparia fabrifuga) නමැති ශාකයේ පොත්ත අංගොස්තුරා පොත්ත නමින් හැඳින්වේ. මේ පොත්තෙන් ලබා ගන්නා සාරය ආහාර රුචිය වඩන්නා වූ කසටයක් (astringent) ලෙසත් ශක්ති ජනක ඖෂධයක් ලෙසත් භාවිත කරනු ලැබේ. ඇංගොස්තුරා සාරය මේ අන්දමට ක්‍රියා කරන්නේ එහි තිබෙන කුස්පරින් (cusparine) නමැති ඇල්කලොයිඩය (බ.) නිසාය.

ඇංගොස්තුරා තිත්ත සාරය පළමුවෙන් ලබා ගන්නා ලද්දේ වෙනිසියුලාවේ කැපුචින් කතෝලික පූජකයන් විසිනි. මුල දී එය අංගොස්තුරා නම් (දැන්, ස්‍යුදාද් වොලීවාර්) නගරයෙන් පිටරට යවන ලද නිර්යාතයක් වූ හෙයින් ඊට එම නම යෙදිණ. ඇංගොස්තුරා සාරය පෙර දී තරම් දැන් භාවිත කරනු නොලැබේ.

(සංස්කරණය:1967)