ඇටිකා

මෙය වූකලි ඇතන්ස් නගරය වටා පිහිටි ප්‍රදේශයයි. පැරණි ග්‍රීසියේ පළාතකි. ඇටිකාව උතුරේ පාර්නීස් හා සිතීරොන් කඳුවල සිට දකුණෙහි සූනියම් තුඩුව දක්වා ඊජියන් මුහුද දෙසට නෙරා ඇති අර්ධද්වීපයක් බඳු වූ ද කඳු සහිත වූ ද භූමි ප්‍රදේශයකි. ඉතා කඩතොලු වූ මෙහි වෙරළෙහි බොකු හා වරායවල් බහුලය. බියෝෂියාවෙන් (බියෝෂියාව බ.) ඇටිකාව වෙන් වන්නේ සිතීරොන් (4623) හා පාර්නීස් (4635) කඳුවලිනි. කොරින්තියන් බොක්ක ඇටිකාවෙහි බටහිර සීමාවයි. පෙලොපනීසය හා ඇටිකාව අතර දේශසීමාව කොරින්ත් දේශ සන්ධියයි. මෙගාරා තැන්න, ඉලියූසිස් තැන්න, ඇතන්ස් තැන්න හා නැගෙනහිර ඇටිකාව ඇටිකාවෙහි ප්‍රධාන භූගෝලීය කොටස් වශයෙන් දැක්විය හැකිය.

පුරාණයේ දී ඔලිව් තෙල්වලට සහ මී පැණිවලට ප්‍රසිද්ධියක් ඉසිලූ මෙහි පෙන්ටෙලිකස් සහ හයිමෙටස් කඳුවලින් ලබාගත් අනර්ඝ කිරිගරුඬ ඇතන්ස්හි දේවස්ථාන තැනීම සඳහා යොදනු ලැබීය. මෙහි ලෝරියම් නම් ස්ථානයෙහි ආදියෙහි පටන් ම රිදී ආකර තුබුණ බවත් ඉතිහාසගත වී තිබේ. ඊයම් ද මේ පළාතෙහි ලැබෙන ලෝහයකි. ග්‍රීසියේ අගනුවර වූ ඇතන්ස් (බ.) මෙහි ප්‍රධාන නගරයයි. 251,328ක ජනගහනයෙන් යුත් පයිරියස් නගරය ඇටිකාවෙහි ප්‍රධාන වරායයි. වර්ග සැතැපුම් 2586ක් වූ මේ පළාතේ ජනගහනය (1950) 1,553,815කි.

(සංස්කරණය: 1967)